Drejtori i arrestuar i Higjienës Komunale, Rustemi paraqitet në prokurori: “Gjithçka është e pastër”

“Gjithçka është e pastër” – ishte komenti i parë i drejtorit të dyshuar të Higjienës Komunale, i cili u soll para gjykatës me kallëzim penal për mosmbledhjen e mbeturinave në Shkup.

Të dy të dyshuarit u sollën para Gjykatës Penale pas kallëzimit penal me të cilin kërkohej edhe paraburgim. Drejtori i Higjienës Komunale të Shkupit, me pranga në duar, dha komentin e tij të parë.

Pyetje nga gazetarët: Pse nuk pastrohej plehrat në Shkup?
Sabahadin Rustemi: Gjithçka është e pastër.

Ata nuk kanë vepruar sipas planit operativ, kanë lejuar formimin e mini-deponive në rrugë dhe trotuare, duke rrezikuar shëndetin e qytetarëve të Shkupit – thuhet në njoftimin e Prokurorisë, pas ngritjes së kallëzimit penal ndaj drejtorit të Higjienës Komunale, Sabahadin Rustemi, dhe shefit të menaxhimit të mbetjeve, Aki Saiti.

Me kallëzimin penal janë përfshirë vetëm dy persona, ndërsa hetimi i përbashkët policor-prokurorial nuk ka prekur asnjë anëtar të Bordit Drejtues, megjithëse edhe ky organ në ndërmarrje ka kompetenca të mëdha për menaxhimin e mbeturinave të Shkupit.

Nga Prokuroria sigurojnë se hetimi deri tani ka gjetur prova vetëm kundër dy të arrestuarve. Të arrestuarit janë nga një strukturë politike, ndërsa kryetarja e Bordit Drejtues është nga një tjetër, e cila aktualisht drejton pushtetin shtetëror.

Nëse përcaktohet përgjegjësi edhe për persona të tjerë, do të veprojmë, sigurojnë nga Prokuroria, e cila ka hapur hetim ndaj Rustemit dhe Saitit për veprën penale të rrezikimit të mjedisit jetësor dhe natyrës përmes mbetjeve, vepër për të cilën parashikohet dënim me burgim nga 1 deri në 10 vjet./Marrë nga Telma/