Bilall Kasami me banorët e Xhermës: Më 19 tetor, e kemi një detyrë – ta vazhdojmë punën

Kryetari i Komunës së Tetovës, Bilall Kasami, ka zhvilluar mbrëmjen e sotme një takim me banorët e fshatit Xhermë, një ndër vendbanimet karakteristike të malësisë së Tetovës. Në këtë takim ishin të pranishëm edhe Albin dhe Besari, bashkëpunëtorë të afërt të Kasamit.

Në një postim në rrjetet sociale, kryetari Kasami ka theksuar se bashkëbisedimi me banorët e Xhermës ishte i frytshëm dhe u fokusua në problemet dhe sfidat me të cilat përballet komuniteti lokal.

“Bashkë me ta biseduam për të arriturat e këtyre katër viteve, për pastrimin e borxheve, për rrugët, pastërtinë dhe për ndryshimin që sot shihet në çdo lagje e fshat të Tetovës,” – ka shkruar Kasami.

Ai po ashtu ka theksuar se janë diskutuar edhe projektet e ardhshme që synojnë zhvillimin e mëtejshëm të zonës, përmes investimeve në infrastrukturë, bujqësi dhe turizëm.

Në fund të postimit, kryetari i Tetovës u ka bërë thirrje qytetarëve për mbështetje në zgjedhjet e 19 tetorit:

“Më 19 tetor, e kemi një detyrë – ta vazhdojmë punën që e nisëm bashkë, ta vazhdojmë rrugën e ndryshimit.”/Zyrtare.net/