Zeqirija Ibraimi: UÇK-ja vlera më e lartë e kombit tonë, turp për ata që shpifin!

Zeqirija Ibraimi, njëri nga liderët e VLEN-it gjatë hapjes së Shtabit sonte në Zhelinë ka dalë me porosi të fuqishme kundër oponentëve politik të cilët së fundmi po shpifin kundër Marrëveshjes së Ohrit dhe kundër UÇK-së, duke angazhuar bile siç tha ai “edhe ca gazetarë”.

“Për oponentët pasi nuk kanë bërë asnjë projekt lokal e asnjë ofertë për pushtetin lokal gjithnjë mundohen të shpikin dhe të shpifin tashmë, sepse nuk u beson askush atyre. Kanë angazhuar ca gazetarë të vegjël të cilët mundohen që të shpifin duke thënë se ne qenkemi edhe kundër UÇK-së dhe MO-së, apo gjepura të tilla”, tha Ibraimi.

Ai rikujtoj se nuk kemi ardhur asnjëherë në pushtet duke shfrytëzuar gjakun e dëshmorëve të UÇK-së.

“Asnjëherë nuk kemi dalë në skenë dhe të bërtasim UÇK, UÇK dhe t’u themi njerëzve se duhet ta na votoni sepse duhet ta blejmë Soravinë, në kohën tonë nuk është vrarë hoxha i Merovës, por është vrarë në kohën e qeverisjes së tyre, andaj të fundit që në këtë planet mund të akuzojnë dikë se a ka respekt apo nuk ka respekt për UÇK-në janë ata”, tha Ibraimi.

Ne kemi respektin e plotë për UÇK-në, shtoi ai, si vlera më e lartë e kombit dhe suksesi më i lartë i kombit tonë, por ju qoftë për turp atyre siç tha, “që e keqpërdorën gjakun e ushtarëve të UÇK-së që ta pasurojnë vetën dhe familjen e tyre”.

Ai ka edhe një porosi për oponentët politik dhe opozitën shqiptare:

“Dhe nëse dikush prej atyre është i gatshëm të ballafaqohet në debat, në çfarë vendi apo cilindo televizion, se si ata i bënë zero djersën dhe gjakun e dëshmorëve dhe në MO-në apo preambulën e saj nuk ndryshuan asgjë në kuptimin e statusit të shqiptarëve jam i gatshëm të ballafaqohem me secilin prej tyre”.