Zbulohet programi i qeverisë ‘Rama 4’: Paga minimale 500 € dhe …

Zbardhet programi i ri qeveritar, i cili pritet të prezantohet nesër në seancën parlamentare. Në kapitullin “Puna dhe Kapitali njerëzor”, qeveria ‘Rama 4’ ka parashtruar disa objektiva ambiciozë për tregun e punës dhe ekonominë, duke synuar rritjen e ndjeshme të pagave dhe uljen e papunësisë.

Planet për pagat dhe punësimin

Sipas dokumentit, një nga prioritetet kryesore është rritja e pagave:

• Paga minimale: Synohet të arrijë në 500 € deri në vitin 2026. Për 18 muajt e parë të kësaj rritjeje, punëmarrësit me paga të ulëta nuk do të kenë asnjë taksë shtesë.
• Paga mesatare: Synohet të arrijë në 1,000 € në nivel kombëtar deri në vitin 2030, ndërsa në sektorin publik pritet të shkojë në 1,200 €.

Përveç rritjes së pagave, programi synon edhe uljen e papunësisë:

• Papunësia e përgjithshme: Qeveria ka si objektiv ta ulë në 6% deri në vitin 2030.
• Papunësia e të rinjve: Synohet që papunësia te të rinjtë të bjerë nën 15%.

Vizioni për arsimin profesional dhe diasporën

Programi thekson rëndësinë e investimit në arsimin profesional si një mjet për të përmbushur nevojat e tregut të punës. Deri në vitin 2030, parashikohet që 1 në 3 nxënës të ndjekë arsimin profesional. Gjithashtu, shkollat profesionale do të transformohen në qendra multifunksionale, duke ofruar konvikte moderne dhe kurse afatshkurtra për profesionet e kërkuara në treg.

Në kuadër të këtij programi, qeveria synon edhe të ndërtojë ura me diasporën shqiptare, duke ofruar:

• Programe të dedikuara për rikthimin e talenteve.
• Transferim të ekspertizës.
• Ndërmjetësim punësimi në sektorët prioritarë.

Gjithashtu, do të vazhdojë puna për nënshkrimin e marrëveshjeve bilaterale për njohjen e pensioneve, duke siguruar kushte të barabarta pune dhe mbrojtje sociale për shqiptarët jashtë vendit.