Suedia lëshon kushtrimin: Bëhuni gati, në Europë po vjen …

Ministri suedez i Mbrojtjes, Pal Jonson, ka bërë një thirrje të fortë për vendet evropiane, duke i kërkuar të rrisin përgatitjet për një konflikt të armatosur. Sipas tij, kërcënimi nga Rusia kërkon që Evropa të kalojë nga një mentalitet i kohës së paqes në një “gatishmëri lufte”.

Jonson e bëri këtë deklaratë në Berlin, gjatë një aktiviteti në Fondacionin Konrad Adenauer, ku theksoi se Rusia po armatoset masivisht dhe po ndërton një ushtri “më vdekjeprurëse”. Ai përmendi përparimet e Moskës në armët me rreze të gjatë dhe në luftën elektronike si arsye për shqetësim.

Ministri suedez theksoi nevojën për një koordinim më të ngushtë brenda NATO-s, duke paralajmëruar kundër fragmentimit të investimeve në mbrojtje. “Nuk dua të shoh fragmentim në investimet për mbrojtjen,” tha ai, duke kërkuar një strategji më të bashkuar.

Pas një periudhe të gjatë neutraliteti gjatë Luftës së Ftohtë, Suedia u bashkua me NATO-n vitin e kaluar si përgjigje ndaj pushtimit rus të Ukrainës. “Ne e shohim Ukrainën si mburojë – ose si shpatë, nëse doni – kundër zgjerimit ushtarak rus,” tha Jonson, duke shtuar se barra financiare për mbështetjen e Ukrainës po bie mbi një numër gjithnjë e më të vogël aleatësh.

Përveç thirrjeve për një përgatitje më të madhe evropiane, Jonson kërkoi gjithashtu një bashkëpunim më të fortë dypalësh në fushën e mbrojtjes me Gjermaninë, duke theksuar se të dy vendet po ndjekin një rrugë të ngjashme strategjike dhe po bëjnë investime rekorde në mbrojtje. Të dyja shtetet po përballen me të njëjtat sfida nga lufta në Ukrainë dhe rreziku rus në rajonin e Detit Baltik.