Shuhet këngëtari i njohur i muzikës popullore shqiptare

Muzika shkodrane ka humbur një prej figurave të saj të çmuara, Agim Mollën. Ai njihej në kryeqendrën e veriut si një nga këngëtaret e fundit te ahengut shkodran dhe një nga mbrojtësit më të mëdhenj të kësaj tradite.

Për lajmin e trishtë, ka reaguar edhe kryebashkiaku Benet Beci, i cili u shpreh ngushëllime familjes dhe kolegëve. Newsbomb.al mëson se Agim Molla ka mbyllur sytë përgjithmonë, mbrëmjen e djeshme, në Spitalin e Shkodrës ku ndodhej i shtruar në gjendje të rëndë.

“U shua simboli i ahengut shkodran! Me interpretimin e tij të veçantë, Agim Molla u bë pjesë e gëzimeve të shumë familjeve shkodrane, duke mbetur në kujtesë si ashiku i muzikës sonë tradicionale”, shkruan Beci.

Agim Molla ishte një zë i rrallë dhe shpirt i gjallë i muzikës popullore shkodrane, i cili do të kujtohet përherë nga familjet shkodrane si “ashiku” që kishte marrë pjesë në qindra gëzime të tyre dhe ua kishte mbushur mjediset familjare me hare dhe gëzim.

Ikja e tij krijon një boshllëk të madh, por pas mbeten gjurmët e arta të një trashëgimie të pashlyeshme, sepse Agim Molla ishte dhe do të mbetet një rojtar i denjë i folklorit, një mbrojtës i këngës së vjetër shkodrane, një pasuri që e pasuroi kombin me zërin dhe shpirtin e tij.