Pse Perëndimi ka frikë nga… “Perëndimi 2025” i Rusisë?

“Zapad 2025” ose “Perëndimi 2025”, wshtë stërvitja ruse dhe bjelloruse që u mbajt ditët e fundit pranë kufijve evropianë, duke dërguar mesazhe të qarta në të gjitha drejtimet: nga njëra anë ishte një shfaqje force dhe nga ana tjetër një simulim lufte.

Duke përdorur të gjitha sistemet konvencionale të armëve që ushtria ruse ka në mënyrë aktive, deri në lëvizjen dhe parkimin e sistemit bërthamor rus Oreshnik, kjo stërvitje konsiderohet me rëndësi kyçe.

“Zapad”-i i parë post-sovjetik u mbajt në vitin 1999 dhe është mbajtur çdo katër vjet që atëherë. Herën e fundit që u zhvilluan ushtrime të përbashkëta ruso-bjelloruse ishte në vitin 2021, pak para pushtimit rus të Ukrainës.

Por nuk është vetëm ky pushtim. Siç thekson analisti ushtarak Joel Linainmäki në gazetën berlineze TAZ, pas stërvitjes ushtarake përkatëse në vitin 2008, njësitë ushtarake ruse u transferuan gjithashtu në Gjeorgji. Pas stërvitjes së vitit 2013, pasoi aneksimi i Krimesë dhe erozioni i Ukrainës lindore.

Si në vitin 2021?

Siç thekson eksperti i TAZ, “një nga qëllimet e stërvitjes ruse është bashkimi i forcave të armatosura bjelloruse dhe ruse”. Kjo është një mënyrë për të siguruar që në rast nevoje dy vendet motra do të jenë në gjendje të veprojnë së bashku. Në të njëjtën kohë, është një mjet për të ushtruar presion mbi udhëheqësin autoritar bjellorus Alexander Lukashenko.

Megjithatë, ndryshe nga viti 2021, ku morën pjesë 200,000 ushtarë, në vitin 2025 morën pjesë rreth 13,000 ushtarë. Risia këtë herë qëndron në testimin e sistemeve të reja dhe futjen e inteligjencës artificiale në teknikat e luftës.

Stërvitja e këtij viti kishte edhe veçori të tjera. Ajo u zhvillua paralelisht me stërvitjen e madhe të NATO-s “Quadriga 2025” në Detin Baltik, me një qendër komande në Rostock nën udhëheqjen gjermane. Gjithashtu u zhvillua disa ditë pas fluturimeve masive të dronëve në hapësirën ajrore polake, të cilat Polonia i konsideron të qëllimshme nga ana e Moskës. /tesheshi.com/