Parashikimi i motit për ditën e nesërme

TIRANË — Sipas parashikimit të motit, dita e premte do të sjellë kushte atmosferike të paqëndrueshme në Shqipëri. Moti do të alternojë mes kthjellimeve dhe vranësirave, të cilat pritet të jenë mjaft të dendura.

Pjesa më e madhe e territorit do të preket nga reshje shiu me intensitet të ulët, veçanërisht në orët e mesditës dhe pasdites. Në zonat malore, reshjet mund të shfaqen në formën e shtrëngatave afatshkurtra.

Sa i përket temperaturave, ato do të luhaten nga një minimum prej 14 gradë Celsius në orët e para të mëngjesit, duke arritur deri në një maksimum prej 30 gradë Celsius gjatë ditës.

Era do të fryjë me drejtim juglindje-veriperëndim me një shpejtësi mesatare prej 5 m/s, ndërsa përgjatë vijës bregdetare shpejtësia mund të arrijë deri në 9 m/s. Valëzimi në det parashikohet i ulët, i forcës 1-2 ballë.