Moti orët në vijim, paralajmëron meteorologia: Pritet…

TIRANË — Meteorologia e Meteoalb, Lajda Porja, ka paralajmëruar se fundjava do të karakterizohet nga mot i paqëndrueshëm, reshje shiu dhe rënie të ndjeshme të temperaturave. Këto ndryshime do t’i japin fund verës së gjatë që zgjati deri në shtator dhe do të sjellin një atmosferë tipike vjeshte.

Shira dhe erë e fortë

Reshjet e shiut do të jenë më të përqendruara në jug dhe juglindje të vendit, ku priten edhe rrebeshe. Ndërsa në veri dhe në qendër, përfshirë Tiranën, reshjet do të jenë më të pakta.

Porja tha se e shtuna dhe e diela do të nisin me kthjellime në orët e paradites, por pjesa e dytë e ditës do të ketë zhvillim të vranësirave dhe reshje shiu.

Një element tjetër shqetësues do të jetë era. Ajo mund të arrijë shpejtësi deri në 50 km/orë në disa momente, sidomos të shtunën në mbrëmje dhe të dielën gjatë natës, duke krijuar probleme në brigjet detare dhe në trafikun detar.

Rënie e ndjeshme e temperaturave

Pas një shtatori jashtëzakonisht të nxehtë, temperaturat do të bien ndjeshëm. Të shtunën, maksimalet do të arrijnë rreth 27-28 gradë Celsius, ndërsa një rënie tjetër do të ndodhë gjatë së dielës dhe në fillim të javës së ardhshme. Kjo rënie e temperaturave do të sjellë një lagështi dhe freski karakteristike të vjeshtës.

Kushtet atmosferike të paqëndrueshme, sipas Meteoalb, pritet të vazhdojnë edhe gjatë javës së ardhshme.