Izet Mexhiti takon banorët e lagjes Jahja Pasha, prezanton projekte dhe vizionin për Çairin

Kandidat i VLEN-it për Çairin, Izet Mexhiti, zhvilloi një takim me banorët e lagjes Jahja Pasha, duke biseduar hapur për punët e realizuara dhe planet për të ardhmen.

Gjatë takimit, Mexhiti prezantoi investimet që kanë përmirësuar jetën e përditshme të qytetarëve, përfshirë ndërtimin dhe asfaltimin e rrugëve, restaurimin e shkollave, rregullimin e kanalizimeve dhe vendosjen e rrjetit atmosferik, si dhe hapjen e parkingjeve të reja.

Ai gjithashtu foli për projektet e ardhshme që synojnë zhvillimin urban, përmirësimin e infrastrukturës dhe krijimin e një lagjeje më funksionale dhe moderne për banorët e Çairit. Banorët patën mundësinë të shprehin kërkesat dhe shqetësimet e tyre, të cilat, sipas Mexhitit, do të marrin zgjidhje siç është bërë edhe në lagjet e tjera të komunës.

“Ky takim është pjesë e lidhjes sonë të vazhdueshme me qytetarët, të cilët na japin drejtim për të ecur përpara,” deklaroi Izet Mexhiti, duke theksuar rëndësinë e dialogut të drejtpërdrejtë me komunitetin./Zyrtare.net/