I vëllai vdiq në aksidentin tragjik në Pejë, reagon për herë të parë Gjesti

PEJË — Fituesi i “Big Brother”, Gjesti, ka reaguar për herë të parë pas humbjes së vëllait të tij, Eldion Kelmendi, në një aksident të rëndë trafiku që ndodhi dje në Pejë.

Nëpërmjet një postimi në llogarinë e tij në Instagram, ekipi i Gjesti-t ka njoftuar orarin dhe vendin e ceremonisë së varrimit. “Me zemër të thyer ju njoftojmë se sot, më 27 Shtator, në ora 17:00, do të mbahet ceremonia e varrimit të Eldion Kelmendit, në varrezat e fshatit Pavlan, Pejë. Jemi pranë familjes në këtë moment të rëndë dhe ju ftojmë ta kujtojmë me respekt e lutje,” shkruhet në postim.

Aksidenti tragjik ndodhi rreth orës 14:00, kur një makinë u përplas me një motor me katër rrota, duke i marrë jetën 21-vjeçarit Eldion Kelmendi, ndërsa një person tjetër mbeti i lënduar rëndë.

I tronditur nga lajmi i hidhur, Gjesti shkoi menjëherë në vendin e ngjarjes, ku emocionet e tij shpërthyen në një mënyrë tejet të dhimbshme. Pamjet e shpërndara në rrjetet sociale tregonin artistin të ulur në tokë, të shokuar dhe të mbytur në lot, teksa thërriste: “O vëllai jem bre”. Njerëzit përreth përpiqeshin ta qetësonin dhe ta mbështesnin në këtë moment tragjik.