Gjendet një trup i copëtuar pranë hekurudhës

Një ngjarje makabre ka tronditur qytetin e Spoleto-s në Itali. Mbrëmjen e së hënës, një kalimtar bëri një zbulim të tmerrshëm pranë një linje hekurudhore në Via Primo Maggio: një trup i copëtuar brenda një çante.

Menjëherë pas denoncimit, në vendin e ngjarjes mbërritën autoritetet, të cilat nisën hetimet për të zbardhur rrethanat e krimit dhe për të identifikuar viktimën. Sipas të dhënave paraprake, viktima është një burrë.

Policia dhe ekspertët mjeko-ligjorë po punojnë për të mbledhur prova, duke kontrolluar me imtësi çantën dhe zonën përreth, me shpresën për të gjetur gjurmë që mund të ndihmojnë në rindërtimin e ngjarjes dhe përcaktimin e kohës kur trupi u braktis. Gjithashtu, po shqyrtohen kamerat e sigurisë për të identifikuar personin ose personat që transportuan çantën në atë zonë, e cila, ndonëse relativisht e izoluar, nuk është shumë larg qendrës së qytetit.

Hetuesit nuk e kanë përjashtuar mundësinë që copëtimi i trupit të ketë ndodhur diku tjetër, dhe më pas ai të jetë transportuar në vendin ku u gjet. Pranohet rezultati i ekzaminimeve mjeko-ligjore për të dhënë më shumë detaje mbi identitetin dhe shkakun e vdekjes së viktimës.