Donald Trump me deklaratë ‘bombë’: Erdhi koha t’i japim fund…

NJU JORK, SHBA — Në fjalimin e tij të parë në Asamblenë e Përgjithshme të Kombeve të Bashkuara që nga viti 2020, Presidenti i SHBA-së, Donald Trump, u shpreh në mënyrë të ashpër dhe paralajmëroi Evropën se migrimi i parregullt po “shkatërron trashëgiminë dhe po dërgon drejt dështimit shtetet”. Ai e cilësoi emigracionin dhe politikat që lidhen me ndryshimet klimatike si një “përbindësh me dy bishta” që po shkatërron kontinentin evropian.

Gjatë fjalimit të tij, Trump theksoi se mbështetja për Evropën është e rëndësishme, por shtoi se vendet evropiane duhet të ndërmarrin veprime urgjente. “Nëse nuk i ndalni njerëzit që nuk i keni parë kurrë më parë, me të cilët nuk keni asgjë të përbashkët, vendi juaj do të dështojë,” tha ai. “Unë jam presidenti i Shteteve të Bashkuara, por shqetësohem për Evropën. E dua Evropën, i dua njerëzit e Evropës. Dhe e urrej ta shoh të shkatërrohet nga energjia dhe imigracioni, ai përbindësh me dy bishta që shkatërron gjithçka pas tij”.

Fjalimi 60-minutësh i Trump-it ishte një kritikë e fortë ndaj politikave të kufijve të hapur, të cilat ai i cilësoi si një “eksperiment të dështuar” dhe i bëri thirrje Evropës t’i japë fund menjëherë. Ai shprehu bindjen se vendet që ndjekin këtë rrugë do të përfundojnë duke dështuar. Trump gjithashtu akuzoi drejtpërdrejt OKB-në për lehtësimin dhe investimin në migrimin e parregullt në të gjithë botën.

Ky fjalim, i cili u përqendrua kryesisht në çështjet e migracionit, sigurisë kufitare dhe politikave të energjisë, ka shkaktuar reagime të ndryshme në skenën ndërkombëtare, duke pasqyruar ndarjet e thella politike rreth këtyre çështjeve.