Ç’pritet nga ky takim në Shtëpinë e Bardhë?

Takimi midis kryeministrit izraelit Benjamin Netanyahu dhe presidentit amerikan Donald Trump është planifikuar të zhvillohet të hënën, më 29 shtator, në Shtëpinë e Bardhë.

Administrata amerikane, e cila thuhet se ka arritur një marrëveshje me udhëheqësit arabë, ndër të tjera, për çarmatimin e Hamasit dhe tërheqjen e Izraelit nga Rripi i Gazës, do të paraqesë një kornizë të detajuar që synon t’i japë fund luftës në Gaza.

Por një gjë është e sigurt – kryeministri izraelit  e ka gjetur veten përballë një muri, madje edhe në prani të Trump, sepse në një moment ai do të duhet të bjerë dakord me atë që po ofron SHBA-ja.

Në shtrëngimin e duarve para takimit, është e sigurt se dora e Trump-it do të ushtrojë më shumë presion që duhet ta detyrojë Netanyahun të nënshkruajë marrëveshjen e armëpushimit.

Duke analizuar fjalët e Netanyahu-t dhe klauzolat e marrëveshjes, të dy nuk janë në harmoni.

Ben Gvir dhe Smotrich, më të zëshmit

Anëtarët kryesorë të koalicionit në Izrael, të cilët janë të afërt me Netanyahu-n, siç është politikani kontrovers i ekstremit të djathtë Itamar Ben Gvir, tashmë po komentojnë publikisht, dhe madje po kritikojnë, se çfarë do të ndodhte nëse Netanyahu do të pranonte marrëveshjen.

“Kryeministër, ju nuk keni mandat për t’i dhënë fund luftës përpara se të mposhtim Hamasin”, shkroi Ben Gvir në statusin e tij të mëngjesit në X. Deklaratat e tij pasohen nga një deklaratë e Bezazel Smotrich, e cila thotë se ai “në asnjë rrethanë nuk do të bjerë dakord për një shtet palestinez”.

Dhe midis njerëzve, situata është ndryshe. Vicky Cohen, nëna e ushtarit të rrëmbyer Nimrod Cohen, deklaroi në një intervistë me Ynet se “është e qartë se kryeministri do të përpiqet ta rrëzojë planin amerikan edhe këtë herë. Shpresoj që Presidenti Trump ta detyrojë atë të përfundojë luftën. Ndryshe do të bëjmë gjithçka që është e mundur në mënyrë që fëmijët të mund të kthehen në shtëpi”.

Vonesat dhe marrëveshjet e dështuara

Plani amerikan nuk është konceptual, as nuk është bërë sipas dëshirave që do t’i përshtateshin Benjamin Netanyahu-t.

Më e rëndësishmja, plani propozon një rrugë drejt krijimit të një shteti palestinez, të kushtëzuar nga reformat dhe një proces i suksesshëm rindërtimi.

Pa njohjen e Autoritetit Palestinez, vendet arabe sigurisht që nuk do të bien dakord me marrëveshjen, dhe disa media po raportojnë se SHBA-të aktualisht po ushtrojnë “presion të fortë” mbi Katarin për të bindur Hamasin që të arrijë një armëpushim në ditët në vijim.

Duket se Netanyahu do të ndjekë një strategji vonese që do të bazohet në mbajtjen e takimeve, pastaj kërkimin e kohës për konsultime me kabinetin, dhe madje “përmirësimin” e planit duke drejtuar gishtin tek fajtorë të ndryshëm.

Donald Trump, i cili flet me lajka për përpjekjet e tij për të arritur paqen dhe luftërat kryesore që ai ka ndaluar gjatë mandatit të tij, mund ta ulë atë gisht në një lëvizje të fortë dhe më në fund ta zgjidhë ekuacionin e paqes në Gaza para komunitetit botëror.

Dhe ndërsa Izraeli po mbytet në dënimin ndërkombëtar, Palestina po rrjedh gjak në gjenocid dhe pengjet izraelite presin të kthehen në shtëpi, duket se ky takim është më shumë sesa diplomaci për kryeministrin Izraelit, sepse mund të vendosë të ardhmen e tij në politikën izraelite, por edhe legjitimitetin e tij ndërkombëtar, nëse ai mbijeton nën presion. /tesheshi.com/