Arrestohen 18 anëtarë të grupit huligan “Vojvodët”, për 8 persona kërkohet paraburgim

Policia e Tetovës ka ndërmarrë një aksion të gjerë ndaj grupit huligan “Vojvodët”, duke arrestuar 18 persona të dyshuar për përfshirje në një incident të rëndë dhune. Sipas informacioneve zyrtare, pjesëtarët e këtij grupi akuzohen se kanë ushtruar dhunë fizike ndaj dy të miturve shqiptarë.

Nga numri i përgjithshëm i të arrestuarve, për 8 prej tyre Prokuroria ka propozuar masën e paraburgimit, ndërsa sot ata kanë dalë para Gjykatës Themelore të Tetovës, ku po shqyrtohet kërkesa e organeve të akuzës.

Ngjarja ka ngjallur reagime të shumta në opinion, duke rikthyer në qendër të vëmendjes problemin e huliganizmit të organizuar nëpër qytetet e Maqedonisë së Veriut. Institucionet ligjzbatuese kanë theksuar se do të vazhdojnë aksionet për parandalimin e rasteve të ngjashme dhe vendosjen e rendit publik.

Dy të miturit shqiptarë që u sulmuan kanë marrë trajtimin e nevojshëm mjekësor dhe janë jashtë rrezikut për jetën. Ndërkohë, hetimet pritet të zbardhin nëse sulmi ka pasur motiv etnik apo ka qenë i nxitur nga rivalitete sportive, duke qenë se grupi i “Vojvodave” njihet si tifozeri e organizuar./ Zyrtare.net