SHPRESA E GJATË ËSHTË SHKAK PËR HARRESËN E AHIRETIT

Shpresa e gjatë e bën njeriun ta harrojë ahiretin, ndërsa ndjekja e pasioneve e largon nga e vërteta.

Pejgamberi (savs) ka thënë:

“Më së shumti për çka unë frikësohem për ju janë shpresa e gjatë dhe ndjekja e pasioneve!”

Gjithashtu Pejgamberi (savs) ka thënë:

“Tri gjendje i konfirmoj për tre persona: Për atë që ia mësynë kësaj bote, atë që e dëshiron fort këtë botë, dhe atë që bëhet dorështrënguar për shkak kësaj bote;

(1) varfërinë pas së cilës nuk do të vijë pasuria,

(2) preokupimin pas së cilit nuk do të vijë koha e lirë, dhe

(3) brengosjen pas së cilës nuk do të ketë lehtësim!”

Kur Ebu Derdai (r.a.), kishte ardhur në qytetin Hims (në Siri), banorëve të tij u kishte thënë:

“A nuk u ju vjen turp:

– të ndërtoni atë ku nuk do të jetoni;

– të shpresoni atë që nuk do ta përjetoni; dhe

– të grumbulloni atë që nuk do ta hani?!

Ata që ishin para jush ndërtuan objekte të forta, grumbulluan shumë pasuri dhe patën shpresa të gjata, por shtëpitë e tyre u bënë varre, shpresat e tyre u dëshmuan se ishin mashtrime, kurse pasuritë e tyre ishin fatkeqësi!” (Gazaliu)

Përktheu: Miftar Ajdini

(Islampress)