Perinski: Numri i këshilltarëve komunalë përcaktohet nga numri i banorëve rezident, kërkesat e opozitës nuk kanë bazë ligjore

Ministri i Vetëqeverisjes Lokale, Zllatko Perinski, konfirmoi se institucionet po bëjnë çmos që ndryshimet e reja në Ligjin për Vetëqeverisjen Lokale të votohen deri më 12 shtator, kur është caktuar seanca e fundit parlamentare para zgjedhjeve.

Ai theksoi se projektligji është përgatitur për më shumë se gjysmë viti, me konsultime dhe debate të gjera me të gjitha palët e interesuara, përfshirë koordinatorët e grupeve të opozitës në Kuvend.

“Më vjen keq që as BDI dhe as LSDM nuk arritën të kapërcejnë dhe mbështesin ndryshimet, megjithëse ato lidhen drejtpërdrejt me forcimin e demokracisë dhe përmirësimin e shërbimeve në nivel lokal”, tha Perinski.

Sipas tij, risitë kryesore janë: futja e mundësisë së revokimit të kryetarit të komunës me referendum, policia komunale e detyrueshme si dhe transmetimi transparent i seancave të këshillave komunale.

Ai foli edhe për numrin e këshilltarëve nëpër komuna, duke shpjeguar se Qeveria kishte ndërhyrë tashmë në përputhje me ndryshimet në numrin e banorëve.

“Në 17 komuna pati korrigjime, në 14 numri i këshilltarëve u ul dhe në tre u rrit”, tha ai.

Ministri shtoi se kërkesat e opozitës për përfshirjen e të gjithë popullsisë në regjistrim nuk janë të justifikuara, sepse sipas ligjit, këshilltarët zgjidhen bazuar në numrin real të banorëve në komunë.

“Nuk ka shembull në botë ku jo-rezidentët merren si parametër për këshilltarët. Qeveria i sqaroi këto dilema që në fillim”, theksoi Perinski.