Kasami shpërthen nga Tetova: Ata e futën komunën në 24 milionë borxh dhe i lanë qytetarët pa ujë!

Në tubimin madhështor në Tetovë, kryetari i Komunës dhe njëri prej liderëve të VLEN-it, Bilall Kasami, solli para qytetarëve një pasqyrë të qartë të qeverisjes së kaluar dhe kontrastin me katër vitet e fundit. Ai theksoi se “administrata, ndërmarrjet publike dhe i gjithë funksionimi i Komunës ishin në gjendje të mjerueshme: punonjës që nuk vinin në punë, kontrata fiktive të shumta dhe mungesë e plotë vullneti për punë”.

Kasami theksoi se dallimi i qeverisjes është i dukshëm me ata të para katër vitesh.

“Ata e futën Komunën 24 milionë euro në borxh dhe i lanë tetovarët pa ujë; Ne edhe e përgjysmuam borxhin, edhe Tetovën e kemi bërë me ujë të pijshëm. Ata, me 24 milionë euro borxh, lanë rrugët e shkatërruara; Ne ulëm borxhin, edhe asfaltuam gati 100 rrugë”.
Sipas tij, katër vite kanë qenë të mjaftueshme për ta ndalur keqbërjen, ndërsa tani “na duhen edhe katër të tjera për t’i dhënë hov zhvillim të komunës sonë”.

Ai renditi dallimet e qeverisjes: asfaltimi i mbi 100 rrugëve, pastrimi i mbeturinave, nisja e stadiumit të Shkëndijës, tre segmente bulevarde të reja dhe vendosja e ndriçimit LED në çdo lagje dhe fshat të komunës.