Halli i Patriarkës së Jerusalemit nën Izraelin

Autoriteti bashkiak i Jerusalemit vazhdoi të “ngrinte” të gjitha llogaritë bankare që i përkisnin Patriarkanës Ortodokse Greke të Jerusalemit, sipas raporteve nga bashkëpunëtorët e Patriarkut Theofilos III, të cilat citohen nga Times of Israel.

“Të mërkurën, më 6 gusht, bashkia e Jerusalemit vendosi në mënyrë të njëanshme të ngrijë llogarinë bankare të Patriarkanës Ortodokse Greke të Jerusalemit. Sipas mendimit tonë, arsyeja për këtë vendim lidhet me çështjen e Arnonit, taksës izraelite të pronës”, thuhet në deklaratë.

Mosmarrëveshja midis Bashkisë së Jerusalemit dhe disa kishave që zotërojnë prona në zonë ka vazhduar për disa vite.

Një marrëveshje e arritur dekada më parë midis kishave dhe Shtetit të Izraelit e kishte penguar Bashkinë e Jerusalemit të mbledhë taksat e pronës nga organizatat e krishtera.

Megjithatë, në vitin 2018, qyteti vendosi që përjashtimi për kishat vlen vetëm për pronat e përdorura “për lutje, për mësimdhënien e fesë ose për nevojat që rrjedhin prej saj” – duke përjashtuar aktivitetet që u shërbejnë pelegrinëve, të tilla si hostele dhe kafene – dhe filloi të ndiqte faturat me vlerë dhjetëra miliona shekelësh.

Në atë kohë, kryetari i atëhershëm i bashkisë Nir Barkat ngriu llogaritë bankare të disa kishave në Jerusalem, të cilat mbyllën Kishën ikonike të Varrit të Shenjtë për tre ditë në shenjë proteste. Bashkia u zbut vetëm pasi ndërhyri Benjamin Netanyahu. Që atëherë, tensionet midis bashkisë dhe autoriteteve të kishës janë ndezur disa herë.

“Si institucione fetare, kishat luajnë një rol jetësor në mirëmbajtjen e institucioneve arsimore, sociale dhe bamirëse që i shërbejnë popullsisë lokale, qoftë e krishterë apo jo”, thuhet në deklaratën e ekipit të Patriarkut Theofilos të Jerusalemit, i cili punon edhe me krerët e kishave të tjera në qytet.

“Për këtë arsye, historikisht, kishat nuk kanë paguar kurrë taksa komunale ose shtetërore për pronat e kishave, qoftë gjatë periudhës së sundimit osman apo britanik”

Sipas organizatës “Mbrojtja e të Krishterëve në Tokën e Shenjtë”, Patriarkana Ortodokse e Jerusalemit nuk është më në gjendje të paguajë pagat e klerit, mësuesve dhe stafit të saj. /tesheshi.com/