Bujar Osmani me plan për shpëtimin e FC Shkupit nga kriza

Kandidati për kryetar të Komunës së Çairit, Bujar Osmani, ka reaguar mbi gjendjen e vështirë të FC Shkupit, duke prezantuar një plan konkret për ta nxjerrë klubin nga kriza dhe për ta rikthyer lavdinë e dikurshme.

Osmani tha se situata aktuale e klubit – largimi i lojtarëve kryesorë, përplasjet mes tifozëve dhe udhëheqësisë, si dhe borxhet e mëdha – është alarmante dhe kërkon veprime urgjente. “Një klub me histori si FC Shkupi nuk mund të mbetet në udhëkryq pa zgjidhje”, deklaroi ai.

Formula e shpëtimit sipas Osmanit:

• Shqyrtimi ligjor i kontratave të stadiumit – Osmani tha se një ekip juristësh do të analizojë marrëveshjet e përdorimit të stadiumit të Çairit, për të parë nëse ka pasur parregullsi në dhënien me koncesion të hapësirave komerciale, të cilat mund të gjeneronin të ardhura për klubin.

• Vlerësimi i pronësisë së huaj – Të shqyrtohet se çfarë garancish apo plane zhvillimore kanë pasur investitorët e huaj kur klubi kaloi në pronësinë e tyre.

• Menaxhimi i borxheve – Sipas Osmanit, FC Shkupi duhet të shfrytëzojë burimet tradicionale të të ardhurave (FFM, UEFA, të drejtat televizive, reklamat, shitja e lojtarëve), duke i menaxhuar ato me transparencë. Ai përmendi se vetëm nga shitja e pesë lojtarëve klubi ka përfituar mbi 3.2 milionë euro.

• Kryesi teknike e përkohshme – Për të garantuar daljen nga kriza, Osmani propozoi themelimin e një kryesie të përkohshme me përfaqësues të komunës, tifozëve, opinionit sportiv dhe udhëheqësisë aktuale.

• Strukturë e re funksionale – Klubi të ketë sektorë të qartë administrativë, financiarë, ligjorë, të marketingut dhe të sigurisë. 10% e aksioneve të mbeten në pronësi të komunës, ndërsa 90% të ndahet mes investitorëve.

• Fuqizimi i Akademisë dhe talenteve të rinj – Osmani theksoi se mbi 300 fëmijë stërviten aktualisht në akademinë e Shkupit, të cilët duhet të jenë baza e zhvillimit të klubit. Ai propozoi bashkëpunim me klubet shqiptare të qytetit për selektimin e talenteve.

Osmani tha se do të promovojë projektin e shpëtimit të FC Shkupit edhe tek bizneset e suksesshme shqiptare, duke i ftuar që të investojnë në një projekt afatgjatë.

“Me sjelljen e investitorëve dhe me një menaxhim profesional, FC Shkupi do të rikthehet në një nga skuadrat më të forta të futbollit vendor, me ambicie për të përfaqësuar denjësisht Çairin dhe shqiptarët në Evropë”, përfundoi Osmani.