Arben Fetai dënon gjuhën e urrejtjes ndaj shqiptarëve gjatë ndeshjes Maqedoni e Veriut–Rumani

Zëvendëskryeministri i Maqedonisë së Veriut, Arben Fetai, ka reaguar ashpër pas thirrjeve ksenofobe dhe përdorimit të gjuhës së urrejtjes ndaj shqiptarëve, të cilat u dëgjuan gjatë ndeshjes kualifikuese për Kupën e Botës në Basketboll 2027, midis Maqedonisë së Veriut dhe Rumanisë, e zhvilluar mbrëmjen e djeshme.

Fetai e cilësoi këtë sjellje si një “tradhti të turpshme ndaj vlerave të respektit dhe fair-play-it që sporti duhet të mishërojë”, duke theksuar se “ksenofobia dhe gjuha e urrejtjes, pavarësisht se nga vijnë, nuk kanë vend në stadiumet tona, në shoqërinë tonë dhe as në të ardhmen tonë të përbashkët”.

Ai u bëri thirrje tifozëve, autoriteteve sportive dhe organeve drejtuese që të ndërmarrin masa të vendosura për të çrrënjosur këtë fenomen, duke paralajmëruar se heshtja apo mosveprimi vetëm sa e thellojnë klimën e urrejtjes.

“Si shtet, ne duhet të promovojmë gjithëpërfshirjen dhe respektin në çdo aspekt të jetës, përfshirë sportin. Le të punojmë së bashku për të ndërtuar një Maqedoni të Veriut ku përçarja nuk është opsion, dhe ku diversiteti është forca jonë, ndërsa uniteti, krenaria jonë”, u shpreh Zëvendëskryeministri Fetai./ZYRTARE.net/