Tragjedi familjare – 15-vjeçarja djeg të atin të gjallë pas dhunës së vazhdueshme në familje

Një ngjarje e rëndë ka tronditur opinionin publik në Egjipt, pasi një vajzë 15-vjeçare ka vrarë të atin e saj duke i vënë flakën shtëpisë. Ngjarja makabre ka ndodhur në zonën Atfih, në jug të qytetit të Giza-s, dhe sipas autoriteteve vendase, krimi është kryer si një akt hakmarrjeje ndaj një babai të dhunshëm dhe abuziv.

Sipas hetimeve paraprake, e mitura kishte qenë shpeshherë dëshmitare e dhunës sistematike që i ati 36-vjeçar ushtronte mbi nënën e saj. Pikërisht në një nga ato momente kur nëna nuk ndodhej në banesë, vajza ka hapur valvulën e gazit në kuzhinë dhe ka lënë ambientin të mbushej me gaz, ndërsa i ati ndodhej në shtëpi. Në çastin kur burri ka ndezur cigaren, ka ndodhur shpërthimi fatal që përfshiu banesën në flakë.

Burri është dërguar me urgjencë në spital në gjendje të rëndë, por nuk ka mundur të mbijetojë për shkak të djegieve të rënda që ka pësuar.

Gjatë marrjes në pyetje nga autoritetet, vajza ka rrëfyer arsyet që e çuan drejt këtij akti ekstrem. Ajo ka deklaruar se babai ishte përdorues i rregullt i alkoolit dhe drogave, se shpenzonte paratë për veset e tij dhe nuk kontribuonte në mirëqenien e familjes. Ajo ka shtuar gjithashtu se ishte dhunuar personalisht nga i ati, veçanërisht në rastet kur ndërhynte për të mbrojtur nënën e saj.

Rasti ka hapur debat të gjerë në Egjipt mbi fenomenin e dhunës në familje, ndikimin traumatik që kjo dhunë ka mbi fëmijët dhe mungesën e strukturave sociale mbështetëse për viktimat. Autoritetet egjiptiane kanë nisur një hetim të plotë për të zbardhur rrethanat e ngjarjes, ndërsa adoleshentja ndodhet nën arrest në pritje të procedurave të mëtejshme ligjore.