Rrëzohet avioni gjatë nisjes – publikohet video tronditëse e momentit të përplasjes!

Një ngjarje e rëndë ka ndodhur këtë të diel në Aeroportin e Londrës Southend, ku një avion i vogël tip Beechcraft B200 Super King Air është rrëzuar pak çaste pas ngritjes dhe është përfshirë nga flakët. Sipas mediave britanike, avioni u përplas në një zonë afër pistës dhe shpërtheu në një top të madh zjarri, duke krijuar një skenë të frikshme dhe alarm të përgjithshëm në aeroport.

Avioni, i cili sapo ishte nisur për në Lelystad të Holandës, kishte mbërritur më herët gjatë ditës nga Pula, Kroaci. Ende nuk është konfirmuar numri i saktë i personave në bord, por sipas autoriteteve, në bord ndodheshin më pak se 10 vetë. Mediat raportojnë se të paktën një person ka mbijetuar pa lëndime, ndërsa për të tjerët pritet konfirmim zyrtar.

Menjëherë pas alarmit, në vendngjarje mbërritën ekipe të shumta shpëtimi:

• Katër ambulanca
• Helikopter emergjence nga Essex & Herts
• Njësi të specializuara për rreziqe të larta (HART)
• Zjarrfikës dhe forca policie

Policia e Essex-it e ka cilësuar ngjarjen si një “incident serioz”, ndërsa autoritetet kanë evakuuar zonat përreth përfshirë Rochford Golf Club dhe Westcliff Rugby Club, për shkak të afërsisë me vendin e përplasjes.

Pas ngjarjes, Aeroporti i Southend ka anuluar të gjitha fluturimet ndërkombëtare të mbrëmjes, përfshirë ato për në Paris, Alicante, Palma dhe Faro. Udhëtarët janë paralajmëruar të kontrollojnë statusin e fluturimeve për ditët në vijim. Kompania EasyJet, një nga operatorët kryesorë të aeroportit, ka anuluar gjithashtu disa fluturime për të hënën.

Deputeti i zonës David Burton-Sampson dhe këshilltari i qytetit Matt Dent, përmes rrjeteve sociale shprehën shqetësimin dhe u bënë thirrje qytetarëve të shmangin zonën për të mos penguar punën e shërbimeve emergjente.

Autoriteti britanik i hetimeve ajrore (AAIB) ka nisur hetimet për të përcaktuar shkakun e rrëzimit. Sipas burimeve të para, një defekt teknik apo dështim i motorëve mund të jetë ndër shkaqet kryesore të tragjedisë. Pamjet e publikuara në media tregojnë flakë të mëdha dhe tym të zi që ngrihej mbi aeroport.

Ngjarja ka sjellë në vëmendje një tjetër çështje delikate që lidhet me sigurinë e fluturimeve të aviacionit të vogël civil, veçanërisht në aeroporte rajonale.