Organizata e Bashkëpunimit Islam, “shkrehje fjalësh” për Gazën

Organizata e Bashkëpunimit Islamik (OIC) ka miratuar një Komunikatë Përfundimtare të jashtëzakonshme, duke dënuar me forcë agresionin e vazhdueshëm izraelit kundër popullit palestinez dhe shënjestrimin e vendeve të shenjta, sidomos Xhamisë Ibrahimi në Al-Khalil. Takimi i Komitetit Ekzekutiv, në nivel Përfaqësuesish të Përhershëm, bëri thirrje për veprime urgjente ndërkombëtare për t’i dhënë fund krimeve dhe shkeljeve të Izraelit.

Në thelb të komunikatës, OIC riafirmon qendrueshmërinë e çështjes palestineze dhe të Al-Kuds Al-Sherif për të gjithë botën islame, duke theksuar nevojën për të mbrojtur identitetin arab dhe islam të qytetit të shenjtë dhe shenjtërinë e vendeve të kultit, si islame ashtu edhe të krishtera.

Komunikata ndër të tjera dënoi ashpër politikën e urisë dhe shkatërrimit sistematik, bllokadën e paligjshme izraelite dhe imponimin e mekanizmave të paligjshëm për shpërndarjen e ndihmave në Rripin e Gazës. Ajo theksoi se veprime të tilla kanë çuar në një përkeqësim “serioz dhe të paprecedentë të vuajtjeve humanitare, duke e bërë Gazën të pabanueshme”. OIC bëri thirrje për hapjen e të gjitha pikave kufitare me Rripin e Gazës dhe tërheqjen e forcave pushtuese.

OIC hodhi poshtë çdo plan apo politikë që synon zhvendosjen e popullit palestinez brenda ose jashtë Palestinës, përfshirë Rripin e Gazës, si dhe ndryshimin e përbërjes demografike. Organizata paralajmëroi shtetet kundër bashkëpunimit me planet izraelite të zhvendosjes, duke e cilësuar atë si “shkelje të rëndë të ligjit ndërkombëtar humanitar”.

Një tjetër pikë qendrore e rezolutës ishte dënimi i planeve izraelite për të marrë në kontroll Xhaminë Ibrahimi në Al-Khalil dhe për t’ia transferuar menaxhimin një këshilli ilegal izraelit, me synimin për të ndryshuar “karakteristikat dhe statusin unik historik, kulturor dhe fetar” të saj. Këto veprime u cilësuan si shkelje flagrante të rezolutave të OKB-së dhe UNESCO-s.

Thirrje për veprim dhe bojkot ndërkombëtar

Komunikata i bën thirrje komunitetit ndërkombëtar të ndërmarrë hapa konkretë, përfshirë vendosjen e sanksioneve ndaj “regjimit kolonial izraelit”, për të ndaluar të gjitha praktikat dhe masat e paligjshme. Ajo theksoi nevojën për të mbajtur Izraelin përgjegjës për të gjitha krimet dhe shkeljet e ligjit ndërkombëtar humanitar, qoftë të kryera nga zyrtarë, forca pushtuese apo kolonë.

Për më tepër, rezoluta kërkon nga shtetet anëtare të rrisin mbështetjen financiare, ekonomike dhe humanitare për Shtetin e Palestinës dhe të aktivizojnë Rrjetin Islamik të Sigurisë Financiare. Një thirrje e veçantë iu bë shteteve anëtare për të bojkotuar të gjitha festivalet dhe aktivitetet akademike, kulturore, artistike dhe sportive të organizuara nga institucionet izraelite, për shkak të rolit të tyre në përjetësimin e regjimit të pushtimit, vendbanimeve koloniale dhe aparteidit.

Sekretariati i Përgjithshëm i OIC u ngarkua me koordinimin e aktiviteteve dhe ngjarjeve për të theksuar rëndësinë e trashëgimisë palestineze, si dhe për të ndjekur zbatimin e kësaj Komunikate Përfundimtare. /Tesheshi.com/