Greqia për migrantët e paligjshëm: “Dy zgjedhje, burg ose largim”

Autoritetet greke kanë filluar zbatimin e një ligji të ri për trajtimin më të rreptë të migrantëve të paligjshëm që vijnë në këtë vend.

Qindra të rinj që mbërritën nga Afrika e Veriut janë çuar në “kampe deportimi” nga ku do të dërgohen në vendet e tyre sapo ligji të hyjë në fuqi.

Ministri Grek i Migracionit dhe Azilit, Thanos Plevris u tha kolegëve të tij nga Bashkimi Evropian se deportimet e migrantëve të paligjshëm duhet të bëhen përparësia kryesore e BE-sw nëse duam të ndalojmë fluksin në rritje të migrantëve.

Plevris e bëri këtë deklaratë gjatë një takimi joformal të ministrave të drejtësisë dhe punëve të brendshme të BE-së në Kopenhagen.

“Kthimi i emigrantëve të paligjshëm duhet të jetë përparësia jonë kryesore. Mesazhi duhet të jetë i qartë: nëse hyni në Evropë ilegalisht ose kërkesa juaj për azil refuzohet, nuk keni të drejtë të qëndroni dhe duhet të ktheheni në vendin tuaj”, theksoi Plevris.

“Ligji është i qartë: Nëse qëndroni në Greqi ilegalisht, opsionet tuaja janë burgu ose kthimi”, përfundoi Plevris.

Si kujtesë, më 17 korrik, Greqia paraqiti një projektligj që do të impononte trajtim më të rreptë për emigrantët pa leje qëndrimi, duke përfshirë mundësinë e një dënimi me burg prej të paktën tre vjetësh nëse ata refuzojnë të largohen vullnetarisht nga vendi. Agjencia gjermane e lajmeve DPA raportoi se projektligji i ri përfaqëson një ndryshim rrënjësor në politikën greke të migracionit, duke futur trajtim ndëshkues për ata që qëndrojnë në vend pa leje.

Deri më tani, njerëzit pa leje qëndrimi janë vendosur në kampe pritjeje ku presin deportimin, me liri të kufizuar lëvizjeje. Sipas ligjit të ri, qëndrimi i paligjshëm do të trajtohet si vepër penale dhe e vetmja mundësi për të shmangur burgun do të jetë largimi vullnetar nga Greqia. “Në të ardhmen, të prekurit do të kenë vetëm dy mundësi: ndalimin ose kthimin”, tha Ministria e Migracionit. /tesheshi.com/