Dogana e Kosovës sekuestron barna të kontrabanduara në Gjilan dhe Viti

Dogana e Kosovës ka njoftuar se gjatë një operacioni të përbashkët me Policinë e Kosovës, janë sekuestruar sasi të konsiderueshme barnash të dyshuara si të kontrabanduara në dy barnatore në qytetet e Gjilanit dhe Vitisë, shkruan Insjaderi.

“Task Forca, e përbërë nga Dogana dhe Policia e Kosovës, gjatë një operacioni kontrolli në dy barnatore në Gjilan dhe Viti, ka zbuluar dhe sekuestruar sasi të konsiderueshme barnash të dyshuara si të kontrabanduara. Gjatë kontrollit të detajuar në ambientet e brendshme të këtyre barnatoreve, janë gjetur barna të fshehura, për të cilat nuk ishte paraqitur asnjë dokumentacion doganor. Dyshohet se këto produkte janë futur në mënyrë të paligjshme në territorin e Kosovës, duke shmangur procedurat e importit dhe detyrimet doganore,” thuhet në njoftimin e Doganës.

Sipas vlerësimeve fillestare, vlera e barnave të sekuestruara kap shifrën mbi 4 mijë euro.

Dogana e Kosovës ka nisur procedurat hetimore ndaj pronarit të subjektit afarist dhe ka njoftuar organet kompetente për ndërmarrjen e veprimeve të mëtejshme ligjore.

“Task Forca mbetet e përkushtuar në luftën kundër kontrabandës, në mbrojtjen e tregut të ligjshëm dhe garantimin e sigurisë së qytetarëve,” përfundon njoftimi.