Pamje të reja të publikuara së fundmi nga Tv Dukagjini në Kosovë kanë hedhur dritë të re mbi ngjarjen e rëndë të ndodhur më 7 korrik në Lipjan, ku humbi jetën 30-vjeçari Agon Zejnullahu pas ndërhyrjes së Policisë së Kosovës.

Videoja, e cila fillon rreth 15 minuta përpara arrestimit fatal të Zejnullahut, dokumenton sjelljen e zyrtarëve policorë në raport me të ndjerin. Ky publikim vjen pas shqetësimeve të ngritura nga familja e Agon Zejnullahut, të cilët, sipas vëllait të tij Albanit, nuk janë njoftuar fillimisht me asnjë raport zyrtar nga policia. Ai ka deklaruar për Dukagjinin se familja ka dyshime se rasti është tentuar të prezantohet në një mënyrë të ndryshme nga ajo që ka ndodhur në realitet.

“Vetëm pasi pamjet u publikuan nga njerëz të vullnetit të mirë dhe mediat, u bë e qartë se çfarë kishte ndodhur në të vërtetë. Ajo nuk është forcë e tepruar, është dhunë çnjerëzore ndaj një qytetari që duhej trajtuar ndryshe…,” ka theksuar Albani, duke vënë në pikëpyetje ashpërsinë e ndërhyrjes policore të filmuar.

Këto pamje të reja duket se kanë ndikuar në reagimin e Inspektoratit Policor të Kosovës (IPK), i cili ka njoftuar arrestimin e pesë zyrtarëve policorë të përfshirë në këtë rast. Ky veprim vjen në kohën kur hetimet janë ende në zhvillim e sipër për të zbardhur plotësisht rrethanat që çuan në vdekjen tragjike të Agon Zejnullahut.

Ndryshe nga sa u raportua fillimisht nga Policia e Kosovës, ku theksohej sjellja agresive e 30-vjeçarit, rezistenca ndaj policisë dhe posedimi i një substance të dyshuar narkotike, pamjet e publikuara nga Tv Dukagjini duket se ofrojnë një perspektivë tjetër mbi ngjarjen. Akuzat e vëllait të viktimës për “dhunë çnjerëzore” nënvizojnë një mospërputhje të mundshme mes rrëfimit zyrtar dhe asaj që mund të shihet në video.

Tashmë, me arrestimin e zyrtarëve policorë të përfshirë, pritet që hetimet të thellohen edhe më tej, duke marrë në konsideratë edhe provat vizuale të ofruara nga pamjet e filmuara. Opinionit publik dhe familjes së të ndjerit u është premtuar një hetim i pavarur dhe transparent për të zbardhur të gjitha rrethanat që çuan në këtë humbje jete.

VIDEO-KLIKO KETU