Andonovski: I ftoj të rinjtë të regjistrohen në portalin uslugi.gov.mk për të aplikuar për vauçer

Në emisionin e djeshëm “Vesti Plus” në televizionin Kanal 5, i ftuar ishte ministri për transformim digjital, Stefan Andonovski, ku foli për masën e re qeveritare, vauçerë për pajisje elektronike për studentët.

“Po e shfrytëzoj këtë rast që t’i ftoj të rinjtë të regjistrohen në portalin kombëtar uslugi.gov.mk. Aplikimi për vauçerët ende nuk ka filluar, por le të krijojnë profilin e tyre që më vonë të mund të aplikojnë lehtë, nga shtëpia,” theksoi Andonovski.

Andonovski shpjegoi se kjo masë ishte paralajmëruar nga kryeministri para 10 muajsh, por vitin e kaluar ishte vonë për ta përfshirë në buxhet. Këtë vit, pas përgatitjeve të bëra nga Qeveria, mjetet janë planifikuar në buxhet dhe zbatimi i masës fillon menjëherë.

“Mbi 50 milionë euro do të shpërndahen për vauçerë për pajisje elektronike për studentët. Kjo është digjitalizim në praktikë, sepse nuk mund të digjitalizojmë vetëm shërbimet pa ua mundësuar të rinjve edhe mjetet për këtë, dhe pa ngritur shkallën e shkrim-leximit digjital,” shtoi ministri.

Ministri theksoi gjatë intervistës se Qeveria po realizon një sërë masash dhe projektesh me fokus te të rinjtë, duke nënvizuar hapjen e institucioneve ndaj tyre.

“Deri më tani nuk ka pasur asnjë masë të këtij lloji për të rinjtë. Në të njëjtën kohë, Qeveria po punëson të rinj të specializuar në shëndetësi, po angazhon të rinj në mbrojtje, dhe në ministrinë tonë është bashkuar një grup i ri i të rinjve. Në këtë mënyrë po i hapim institucionet kyçe për qytetarët drejt të rinjve. Në fushën time po sigurojmë zona interneti falas, me fokus në konviktet studentore, dhe këtë projekt do ta fillojmë nga Manastiri”, përfundoi ministri Andonovski.