Tjetër aksident pas tragjedise me 242 te vdekur, avioni del nga pista dhe përfundon në…

Një avion pasagjerësh i kompanisë JetBlue doli nga pista gjatë uljes në aeroportin ndërkombëtar Logan të Bostonit paraditen e së enjtes, duke shkaktuar shqetësim mes pasagjerëve, por fatmirësisht pa raportuar të lënduar.

Fluturimi JetBlue 312, që kishte nisur nga aeroporti O’Hare i Chicagos, mbërriti në Boston rreth orës 11:55 sipas kohës lokale. Sipas njoftimit të Administratës Federale të Aviacionit (FAA), avioni doli nga pista teksa po lëvizte drejt zonës së taksimit pas uljes dhe u ndal në një zonë me bar anësor të pistës.

Autoriteti Portual i Massachusetts (Massport) konfirmoi se të gjithë pasagjerët dhe ekuipazhi ishin në gjendje të mirë shëndetësore. Evakuimi u krye në mënyrë të kontrolluar, përmes shkallëve të jashtme, ndërsa pasagjerët u transportuan me autobusë drejt terminalit.

Pista ku ndodhi incidenti u mbyll përkohësisht për arsye sigurie, ndërkohë që ekspertët nisën inspektimin e avionit të tipit Airbus A220 për të përcaktuar shkakun e daljes nga pista. Autoritetet po hetojnë nëse incidenti lidhet me faktorë teknikë, kushtet atmosferike apo ndonjë problem operacional.

Pamje të realizuara nga pasagjerë të tjerë, që ndodheshin në avionë të afërt, tregojnë ndërhyrjen e menjëhershme të ekipeve të emergjencës dhe zjarrfikësve në vendngjarje.

Ky incident ndodhi vetëm pak orë pas një tragjedie të rëndë ajrore në Indi, ku një avion i kompanisë Air India u rrëzua pas ngritjes nga aeroporti i Ahmedabadit, duke shkaktuar mbi 240 viktima. Ngjarjet e njëpasnjëshme kanë vënë në alarm autoritetet e aviacionit dhe kanë rritur shqetësimin e udhëtarëve në mbarë botën.

Si masë paraprake sigurie, FAA pezulloi përkohësisht uljet dhe ngritjet në aeroportin Logan nga ora 13:00 deri në 14:00 me orën lokale. Për pasojë, disa fluturime u përballën me vonesa mesatare prej 30 minutash.

Hetimet për incidentin në Boston janë në zhvillim e sipër, ndërsa kompania JetBlue nuk ka dhënë ende një deklaratë të plotë mbi ngjarjen. Autoritetet janë zotuar për transparencë të plotë dhe do të publikojnë gjetjet sapo të jenë në përfundim të analizave teknike.