Shkoi me bashkëshortin për pushime në Tajlandë, mbytet 41-vjeçarja shqiptare (Emri)

Një 41-vjeçare shqiptare, e identifikuar si Daniela Idrizi, ka humbur jetën tragjikisht në Tajlandë, pasi dyshohet se është mbytur në plazhin e njohur të Karonit në Phuket.

Daniela Idrizi kishte mbërritur në Phuket vetëm dy orë para incidentit, së bashku me bashkëshortin e saj 43-vjeçar, Mohammed Abdulkhaliya Hamdi Alsaba, me shtetësi egjiptiane. Çifti kishte zgjedhur plazhin Karon për të shijuar disa momente relaksi dhe për t’u larë në det.

Sipas raportimeve, pas rreth 10 minutash në ujë, bashkëshorti i Danielës ka vënë re zhdukjen e saj. Menjëherë pas kësaj, ai ka kërkuar ndihmë nga personeli i shpëtimit dhe rojet bregdetare të plazhit. Ekipet e shpëtimit u angazhuan menjëherë në kërkim dhe pas rreth një ore, Daniela Idrizi u gjet nga rojet bregdetare dhe u nxor nga uji pa ndjenja.

Ekipet e ndihmës së shpejtë nga Spitali Chalong mbërritën në vendin e ngjarjes dhe u përpoqën me të gjitha mjetet ta mbanin në jetë, duke kryer edhe manovra të reanimacionit, por përpjekjet e tyre ishin të kota dhe mjekët konstatuan vdekjen e saj.

Plazhi i Karonit, i njohur për bukurinë e tij, raportohet gjithashtu se mund të ketë rryma të forta uji, veçanërisht gjatë sezonit të musoneve nga maji deri në tetor. Edhe pse në zonë ka roje bregdetare, turistët duhet të jenë të kujdesshëm gjatë notit. Autoritetet lokale shpesh vendosin flamuj të kuq për të paralajmëruar rrezikun nga rrymat e forta. Nuk dihet ende nëse ka pasur paralajmërime të tilla ditën e incidentit.

Ambasada shqiptare në Tajlandë pritet të ndjekë nga afër këtë ngjarje tragjike dhe të ofrojë ndihmën e nevojshme për familjen e viktimës. Detaje të tjera rreth rrethanave të mbytjes dhe ndonjë hetim i mundshëm nga autoritetet tajlandeze pritet të bëhen të ditura në orët në vijim. Humbja e papritur e Daniela Idrizit ka lënë të tronditur familjarët dhe miqtë e saj.