Një tjetër tërmet godet vendin. Lëkundjen ndihen dhe në Tiranë – Ç’thonë ekspertët

Shqipëria është goditur nga një tjetër lëkundje sizmike pas tërmetit të fuqishëm me magnitudë 4.4 të shkallës Rihter që u regjistrua në orët e para të mëngjesit të sotëm. Sipas të dhënave zyrtare, rreth orës 14:21 me orën lokale, është ndjerë një tërmet me magnitudë 3.3 të shkallës Rihter.

Epiqendra e këtij tërmeti të dytë është lokalizuar rreth 11 kilometra në veriperëndim të kryeqytetit, Tiranës. Lëkundja sizmike ka pasur një thellësi prej 10 kilometrash dhe ekspertët e kanë klasifikuar atë si një nga pasgoditjet e tërmetit kryesor që tronditi vendin në mëngjes.

Kjo pasgoditje me magnitudë 3.3 është ndjerë lehtë nga banorët e Tiranës dhe zonave përreth, por deri tani nuk ka asnjë raportim për dëme materiale të reja apo persona të lënduar si pasojë e saj.

Instituti i Gjeoshkencave në Shqipëri po vijon monitorimin e vazhdueshëm të situatës sizmike në vend. Ekspertët kanë sqaruar se pasgoditjet janë një zhvillim i natyrshëm dhe i zakonshëm që ndodh pas një tërmeti kryesor, dhe pritet që aktiviteti sizmik të monitorohet me kujdes në ditët në vijim.