Lufta Izrael-Iran, përfshihet edhe Rusia, ja lëvizja e fundit e Vladimir Putin

Një aleat i presidentit rus Vladimir Putin paralajmëron se sulmet ajrore të Izraelit ndaj Iranit mund të çojnë drejt “një lufte të plotë” në Lindjen e Mesme, ndërsa tensionet në rajon arrijnë kulmin.

Konstantin Kosachev, nënkryetar i dhomës së lartë të parlamentit rus, deklaroi se Moska qëndron krah Iranit, aleatit të saj, dhe dënoi sulmet, duke i cilësuar si “të pajustifikueshme nga pikëpamja ligjore, politike, ushtarake dhe morale”.

“E vetmja shpresë, edhe pse iluzore, për të shmangur një luftë të plotë, qëndron te dënimi i konsoliduar i këtij operacioni nga bashkësia ndërkombëtare”, tha Kosachev, sipas agjencisë ruse TASS.

Ai theksoi se, pavarësisht provave të përmbajtjes nga ana e Iranit, “durimi i Teheranit ka kufij”, ndërsa “rrethi vicioz i përshkallëzimit po rritet me shpejtësi”.

“Netanyahu deklaroi se Izraeli goditi ‘në zemër të programit të pasurimit bërthamor të Iranit’. Por sulmet që po shohim tani, që nga vrasja e komandantëve të lartë ushtarakë iranianë e deri te eliminimi i disa shkencëtarëve bërthamorë, tregojnë se kjo nuk është fundi i historisë. Një përgjigje iraniane ndaj Izraelit duket e pashmangshme”, paralajmëroi Kosachev.

Izraeli ndërmori një seri sulmesh ajrore në Iran të premten në mëngjes, duke synuar instalime kritike bërthamore dhe ushtarake. Sipas mediave shtetërore iraniane, dy komandantë të lartë ushtarakë dhe disa shkencëtarë bërthamorë u vranë nga sulmet, që shënojnë një nga sulmet më të rënda brenda Iranit që nga lufta Iran-Irak e viteve 1980. Bota po ndjek me shqetësim zhvillimet, ndërsa rritet frika që përshkallëzimi i konfliktit të dalë nga kontrolli, me pasoja të rënda për stabilitetin e të gjithë Lindjes së Mesme.