Leonard Duka zbulon cfare ka bere me Ervis Martinajn

Kreu i klanit “Duka”, Leonard Duka ka pranuar këtë të martë në sallën e gjyqit se ka takuar biznesmenin e zhdukur të basteve Ervis Martinaj. I njohur dhe me nofkën “Princi Damian”, ai është përballur dhe me nënën e Santiago Malkos, ish-policin që akuzohet se urdhëroi ta vrisnin.

Bukurie Malko i është betuar Leonard Dukës se do ta vriste, pasi i kishte futur në dhe djalin. Për shkak të tensioneve në sallën e gjyqit, gjyqtari ka marrë vendimin që nëna e Malkos të dilte nga seanca.

“S’ta fal gjakun e djalit kurrë, do ta vras. Më fute djalin në dhe”, është shprehur ajo.

Ndërkohë, SPAK i përfaqësuar në këtë proces nga prokurori Behar Dibra, ka paraqitur prova të reja nga bisedat e zbardhura nga dosja e “SKY ECC”. Leonard Duka fillimisht ka mbajtur qëndrim mohues, por më vonë ka pranuar se është takuar me Ervis Martinaj.

Nuk dihet nëse takimi i pranuar nga “Princi Damian” me biznesmenin e kumarit dhe basteve ka ndodhur gjatë kohë që i referohen bisedat në “SKY ECC”, më shumë se katër vite më parë, apo mes dy miqve që u kthyen në armiq ka pasur takime të mëvonshme.

Avokatja pyet Dukën: A keni patur Sky Ecc?

Duka: Jo.

Kur pyetet për kodin, Duka thotë: S’e kam idenë.

Avokati: Keni patur kontakte me persona që kanë patur Sky?

Duka: Jo s’kam patur asnjë kontakt.

Kur pyetet lidhur me një foto të gjetur në Sky, Duka thotë: Nuk jam unë.

Behar Dibra: Me Ervis Martinaj keni komunikuar, keni patur kontakte?

Duka: Po e kam takuar.

Dibra: Po komunikime të tjera?

Duka: Jo.

Dibra: Po babai juaj ka patur ndonjë problem e keni ndarë me njeri?

Duka: Babai im s’ka patur asnjë problem.

Ervis Martinaj, një ndër eksponentët më të rëndësishëm të krimit shqiptar dhe personazhi më i kërkuar nga drejtësia, rezulton i zhdukur pa gjurmë prej afro tre vitesh. Prej datës 9 Guht 2022, askush nuk di asgjë për fatin dhe vendndodhjen e tij.

Këtë e ka pranuar sot dhe vetë SPAK. Prokurori i posaçëm Behar Dibra është shprehur në sallën e gjyqit se organi i akuzës nuk di asgjë për fatin e “mbretit të kumarit” dhe as vendndodhjen e tij.

Dibra është përfaqësues i SPAK në gjyqin kundër kreut të klanit “Duka”, shtetasit Leonard Duka, për vrasjen e ish-policit Santiago Malko. Avokatja e tij ka kërkuar që në gjyq të thirret për të dëshmuar dhe Ervis Martinaj, por SPAK ka “ngritur duart” përballë kësaj kërkesë.

“Për thirrjen e personave për të dhënë deshmi, nuk dihet akoma fati i Ervis Martinaj, vendndodhja e tij per më tepër. Disa prej tyre që kërkohen nga avokatja janë pjesë e këtij gjykimi. Leonard Duka mund të dëshmojë patjetër. Të tjerët janë të pabazuar”, është shprehur prokurori Behar Dibra.

Edhe sot e kësaj dite, biznesmeni i basteve dhe një ndër njerëzit më të fuqishëm të kumarit në vend, rezulton i zhdukur pa gjurmë.

Për zhdukjen e tij janë hedhur shumë hipoteza, nga aleanca e grupeve kriminale për ta hequr qafe, e deri te mundësia që ai të jetë tërhequr vetë nga aktiviteti, për shkak të ofensivës së madhe të rivalëve. Megjithatë, të gjitha kanë mbetur thjesht hipoteza.

Zyrtarisht, Ervis Martinaj rezulton i zhdukur pa gjurmë prej datës 10 Gusht 2022 dhe për këtë fakt, familja ka bërë në të njëjtën datë kallëzim në Policinë e Lezhës. Ishin vetë ata që gjetën pamjet e kamerave të sigurisë ditë më pas, duke i dorëzuar pranë autoriteteve.