E FUNDIT! Izraeli nuk ndalet, nis sulmet e reja me raketa. Çfarë po ndodh

Raportohen shpërthime të reja në zona të ndryshme të Iranit, sipas informacioneve të fundit që vijnë nga rajoni. Forca Ajrore Izraelite konfirmoi përmes një postimi në X se po vazhdon sulmet e saj, duke u fokusuar në lëshues raketash dhe infrastrukturë kritike brenda Iranit.

“Informacione bëjnë fjalë për shpërthime në Teheranin perëndimor (provincë)”, në qytetet Shahriar dhe Malard dhe rreth lagjes Sitgari të qytetit të Teheranit, raportoi Irna. Sipas agjencisë Mehr, një shpërthim u dëgjua në Pakdasht, një qytet në juglindje të kryeqytetit.

Gjithashtu, agjencia Fars raportoi se u dëgjuan dy shpërthime të fuqishme nga zona ku ndodhen impiantet bërthamore të Fordos, ndërsa Nournews bëri fjalë për shpërthime dhe tym në provincën Alborz. Sipas Press TV, mbrojtja ajrore rrëzoi një dron izraelit pranë Fordos.

Kanali televiziv Press TV transmetoi se mbrojtja ajrore u aktivizua dhe përgjoi raketa në jug të Teheranit.

Tensionet e larta mes Izraelit dhe Iranit kanë shpërthyer në një konflikt të armatosur pasi Forcat Ajrore Izraelite kanë ndërmarrë një sulm të gjerë ndaj objektivave strategjike brenda Iranit, të cilat dyshohet se përdoren për qëllime bërthamore dhe ushtarake. Operacioni, i koduar me emrin “Operacioni Luan i Ngritur” (Rising Lion), ka goditur dhjetëra lokacione, duke përfshirë qendra të pasurimit të Uranit, fabrika raketash dhe baza të Gardës Revolucionare Islamike (IRGC).

Sipas raporteve të agjencive ndërkombëtare, sulmet izraelite, të cilat nisën në orët e para të mëngjesit të së premtes (13 qershor 2025) sipas kohës lokale, kanë shënjestruar rreth 100 objektiva. Nga raportimet e para, mes të vrarëve konfirmohet edhe gjenerali Hossein Salami, Komandant i Gardës Revolucionare Islamike, si dhe shkencëtarë të lartë bërthamorë iranianë.

Forca Ajrore Izraelite ka konfirmuar përmes një postimi në platformën X se po vazhdon sulmet e saj, duke u fokusuar në lëshues raketash dhe infrastrukturë kritike brenda Iranit.

Irani kundërpërgjigjet me dronë, rriten shqetësimet për luftë të shkallës së plotë

Menjëherë pas sulmeve izraelite, Irani ka reaguar me lëshimin e më shumë se 100 dronëve drejt Izraelit. Shumica e tyre raportohet se u neutralizuan nga sistemet e mbrojtjes ajrore izraelite. Autoritetet iraniane kanë deklaruar se përgjigja e tyre ndaj sulmeve izraelite do të jetë e ashpër dhe vendimtare. Madje, Komandanti i ri i Gardës Revolucionare të Iranit ka thënë se “portat e ferrit” do të hapen mbi Izraelin.

Reagime Ndërkombëtare dhe Rritje e Tensioneve

Sulmet kanë shkaktuar një reagim të menjëhershëm nga komuniteti ndërkombëtar. Një aleat i presidentit rus Vladimir Putin ka paralajmëruar se një luftë në shkallë të plotë në Lindjen e Mesme është e mundur pas këtyre sulmeve. Konstantin Kosachev, një zyrtar i lartë rus, ka dënuar veprimet e Izraelit dhe ka theksuar se Rusia do të mbështesë Iranin.

Presidenti i Turqisë, Recep Tayyip Erdogan, e ka cilësuar sulmin izraelit si një “provokim të qartë” që shkel ligjin ndërkombëtar dhe rrezikon stabilitetin rajonal. Ai ka akuzuar qeverinë izraelite dhe Kryeministrin Benjamin Netanyahu për veprime të rrezikshme dhe ka kërkuar nga komuniteti ndërkombëtar t’i thotë “ndal” këtij “banditizmi”.

Fluturimet ndërkombëtare që kalojnë nëpër rajon janë devijuar për shkak të rritjes së tensioneve. Sekretari amerikan i Shtetit, Marco Rubio, ka deklaruar se Shtetet e Bashkuara nuk ishin të përfshira në sulme dhe se Izraeli beson se ato janë të nevojshme për vetëmbrojtje.

Ndërkohë, Irani ka njoftuar se ka filluar hartimin e një plani përgjigjeje të gjerë ndaj sulmit izraelit.

Situata në Lindjen e Mesme është jashtëzakonisht e paqëndrueshme, dhe bota po ndjek me shqetësim zhvillimet e orëve të fundit, me frikën se përshkallëzimi i konfliktit mund të ketë pasoja të rënda rajonale dhe globale. Izraeli ka shpallur gjendjen e emergjencës dhe po përgatitet për kundërpërgjigjen e mundshme nga Irani.