Andonovski: Ishim i vetmi shtet në rajon që nuk kishte Ligj për Siguri Kibernetike

Në diskutimin panel të mbajtur sot në Qeverinë e Republikës së Maqedonisë, foli ministri për transformim digjital, Stefan Andonovski. Ai bëri një përmbledhje të punës së ministrisë së re për transformim digjital dhe projekteve që janë realizuar gjatë kësaj periudhe.

“Gjërat e para me të cilat filluam të punojmë ishin agjenda reformuese dhe treguam në praktikë se mund ta përmbushim detyrën tonë. Me miratimin e katër ligjeve që dolën nga Ministria për Transformim Digjital, arritëm të lirojmë 19 milionë euro nga BE-ja, nga të cilat më shumë se 5 milionë euro janë pjesë e një granti”, deklaroi Andonovski.

Ai shtoi se kemi qenë i vetmi shtet në rajon që nuk kishte një Ligj për sigurinë kibernetike, dhe se tani për herë të parë po e marrim një të tillë. Lidhur me atë që është bërë deri tani, ai theksoi se janë ndërmarrë hapa konkretë dhe është bërë përparim i rëndësishëm në transformimin digjital.

“120 shërbime të reja elektronike dhe një portal kombëtar i ridizajnuar, hapja e qendrave të shërbimeve më afër qytetarëve që përfitimet e digjitalizimit të ndihen nga secili qytetar, më shumë se 20 institucione të reja janë lidhur në platformën e ndërveprueshmërisë dhe çdo dokument nga portali kombëtar është i vlefshëm njësoj si dokumentet në letër. Këto janë themelet e transformimit digjital”, theksoi Andonovski.

Andonovski foli edhe për një problem të mprehtë që përballen qytetarët – lojërat e fatit të paligjshme, të cilat tashmë po rregullohen, dhe ato që janë në kundërshtim me ligjet po ndalohen me qëllim që të mbrohen qytetarët nga sulmet kibernetike.

“Me një vendim të Qeverisë, ndoshta më radikal, por i domosdoshëm, ndaluam lojërat e fatit të paligjshme. Me vendimin e fundit, mbi 220 faqe janë ndaluar dhe do të vazhdojmë në këtë drejtim, sepse qytetarët, veçanërisht të rinjtë, duhet të mbrohen në internet”, tha Andonovski, dhe shtoi: “Fillimisht përgatitëm strategjinë kombëtare për sigurinë kibernetike në fund të vitit 2024, dhe menjëherë më pas kaluam në miratimin e Ligjit të parë për sigurinë kibernetike, i cili është plotësisht i harmonizuar me rregulloren evropiane dhe kërkesat e partnerëve tanë të NATO+-s.”