Haradinaj: Jam shumë i lumtur që votimet e deritashme kanë kaluar pa asnjë incident serioz

Kreu i Aleancës për Ardhmërinë e Kosovës, Ramush Haradinaj përmes një adresimi iu ka bërë thirrje qytetarëve që ende nuk kanë votuar të dalin dhe të shfrytëzojnë të drejtën e tyre për votë.

Haradinaj është shprehur i lumtur që deri me tani votimet kanë kaluar pa asnjë incident serioz.

Adresimi i plotë i Haradinaj:

Të dashur qytetarë të Kosovës me të drejtë vote,

Kosova edhe një herë po e jep provimin e vet të demokracisë. Jam shumë i lumtur që votimet e deritashme kanë kaluar pa asnjë incident serioz dhe në një frymë tolerante e krejtësisht demokratike.

Meritat më të mëdha për këtë mbarëvajtje i kanë vajzat dhe djemtë që janë marrë me organizimin e zgjedhjeve, shtabet e të gjitha partive politike dhe organet ligjzbatuese.

Meqenëse kanë mbetur edhe pak orë deri në mbylljen e kutive, ju që akoma nuk keni votuar, ju ftoj që ta shfrytëzoni të drejtën tuaj dhe të votoni. Vetëm me votë mund të bëheni pjesë e vendimmarrjes e t’i zgjidhni përfaqësuesit tuaj në Parlament e në Qeveri.

Vota juaj është veprimi më i madh që mund ta bëni sot për vendin tuaj!

Me respekt,

Ramush Haradinaj