Treguesit: shteti “më demokratik” i Lindjes së Mesme si armik i medias

Gjithsej 361 gazetarë ishin pas hekurave në mbarë botën në fund të vitit 2024, sipas të dhënave nga Komiteti për Mbrojtjen e Gazetarëve (CPJ) në një raport që e rendit Izraelin për herë të parë në mesin e vendeve që burgosin më shumë gazetarë, i dyti vetëm pas Kinës.

Ky numër i vlerësuar, më i madhi nga 370 gazetarët e burgosur të regjistruar në vitin 2022, “duhet të jetë një sinjal paralajmërues”, tha në një deklaratë Jodie Ginsberg, kreu i kësaj organizate joqeveritare amerikane që mbron lirinë e medias.

Që nga 1 dhjetori, Kina mbante 50 gazetarë në burgjet e saj, Izraeli 43 dhe Mianmari 35, njoftoi organizata joqeveritare, duke dënuar “tre nga shkelësit më të këqij në planet”, raporton France Presse.

CPJ vë në dukje se “censura e përhapur” në Kinë e bën të vështirë marrjen e një vlerësimi të saktë për atë vend dhe tregon për një rritje të numrit të gazetarëve të Hong Kongut të burgosur, si manjati i medias Jimmy Lai, i cili është në burg që nga fundi i vitit 2020.

Arrestimi i një gazetari

Izraeli, një shtet me sistem shumëpartiak ndryshe nga Kina, është në krye të kësaj renditjeje pas luftës kundër Hamasit në Rripin e Gazës që nga vjeshta e vitit 2023.

Izraeli “e katapultoi veten në vendin e dytë duke u zhytur në mbulimin e çështjeve nga territoret e pushtuara palestineze“, vëren OJQ-ja me bazë në Nju Jork. “Kjo përfshin ndalimin e hyrjes së gazetarëve të huaj (Gaza) dhe ndalimin e transmetuesit të Katarit Al Jazeera që të operojë në Izrael dhe Bregun Perëndimor të pushtuar”, shkroi CPJ.

Numri i gazetarëve të ndaluar në Izrael dhe në territoret palestineze është dyfishuar brenda një viti. Me 43 gazetarë të burgosur deri më tani, të gjithë palestinezë, Izraeli tani renditet, sipas OJQ-së, përpara Mianmarit me 35, Bjellorusisë me 31 dhe Rusisë me 30 gazetarë të burgosur.

“Rritja e sulmeve ndaj gazetarëve pothuajse gjithmonë i paraprin sulmeve ndaj lirive të tjera: liria e shprehjes dhe aksesi në informacion, liria e lëvizjes dhe grumbullimit, liria për të protestuar…”, është e shqetësuar Jodie Ginsberg.

Kontinenti më i prekur është Azia. “Gazetarët që donin të ekspozonin korrupsionin dhe mizoritë, ose ndikimin shkatërrues të ndryshimeve klimatike mbi popullsinë lokale, u gjendën pas hekurave”, paralajmëron Beh Lih Yi, drejtori i CPJ-së për Azinë. /tesheshi.com/