Le Monde: Kostoja e pastrimit të Evropës nga “ndotësit e përjetshëm”

Pastrimi i ujit dhe tokës së Evropës nga “ndotësit shumëvjeçarë” (PFAS) do të kushtonte të paktën 95 miliardë euro gjatë një periudhe 20-vjeçare në kushtet më të favorshme dhe fatura mund të arrijë në dy miliardë euro, sipas hulumtimit të disa mediave, të koordinuara nga gazeta franceze Le Monde.

Kostoja më e lartë “është shumë më realiste”, vëren Le Monde, bazuar në punën akademike dhe kërkimin e kryer si pjesë e konsorciumit mediatik “Forever Lobbying Project” mbi këto substanca të alkiluara të perfluorinuara dhe të polifluoruara (PFAS).

Kjo për shkak se kjo llogaritje “nuk përfshin as ndikimin e PFAS në sistemet tona shëndetësore, as një mori eksternalesh negative që janë tepër të vështira për t’u llogaritur”, shton gazeta franceze.

Ky hulumtim është një vazhdim i një studimi të gjerë të publikuar në vitin 2023, i cili tregoi se ka “të paktën 23,000 vende të kontaminuara” në kontinent nga këto kimikate, të cilat njihen për vetitë e tyre jo ngjitëse dhe rezistencën ndaj ujit.

Praktikisht të pathyeshëm, “ndotësit e përjetshëm” përfshijnë mbi 4700 molekula dhe grumbullohen me kalimin e kohës në tokë, lumenj dhe madje edhe në trupin e njeriut. Në rastin e ekspozimit afatgjatë, ato mund të kenë pasoja në fertilitet ose të nxisin shfaqjen e disa formave të kancerit, sipas studimeve fillestare.

Për të llogaritur koston e pastrimit, media, në bashkëpunim me dy studiues, u mbështet në “informacionet e pakta shkencore dhe ekonomike që ishin në dispozicion”, si dhe “të dhënat lokale të mbledhura nga pionierët e pastrimit”.

“Secili nga skenarët në vlerësimin tonë bazohet në një sërë opsionesh konservatore, gjë që na lejon të vërtetojmë se kostot janë patjetër të nënvlerësuara”, theksojnë autorët e gjetjeve të hulumtimit.

Ky hulumtim, i cili bazohet në “mijëra dokumente”, zbulon gjithashtu një fushatë të industrialistëve, e cila karakterizohet si “ngacmim i autoriteteve publike nga një grup lobistësh”, që synon “dobësimin, madje edhe varrosjen” e një plani për ndalimin e PFAS në nivel evropian. /tesheshi.com/