Ekskluzive | Ja për çka u denoncua në hetuesi Gani Jakupi

Në Drejtorinë Ekonomike, është dorëzuar një denoncim ndaj këshilltarit të jashtëm për çështje kulturore dhe mediatike në MPJD, Gani Jakupi. Gazeta Insajderi, ka siguruar denoncimin e bërë nga Majlinda Bregasi, bashkëpunëtore e Gani Jakupit. Këta dy të fundit kishin themeluar bashkërisht një organizatë.

Denoncuesja e rastit siç merr vesh Insajderi, dje ka dhënë intervistë rreth tri ore në polici derisa tash është procesi i kontrollit të llogarive bankare të Gani Jakupit.

Cilat janë pretendimet ndaj tij?

“Shpërlarje e parave, shmangia nga tatimi, mashtrimi, konflikti i interesit, falsifikimi i dokumentit zyrtar“, janë veprat penale për të cilat Jakupi është denoncuar në Krimet Ekonomike.

Sipas Bregasit, bashkëpunëtore e Gani Jakupit, ka dyshime se ky i fundit në cilësinë e bashkëthemeluesit të OJQ-së, ka falsifikuar dokumentat.

“Ekziston dyshim i bazuar se z. Gani Jakupi, në cilësinë e bashkëthemeluesit të OJQ-së, i ka falsifikuar dokumentet e OJQ’së dhe të njëjtat i ka dorëzuar në institucione publike me rastin e aplikimit për projekte të caktuara dhe po ashtu dokumentet e falsifikuara  i ka përdorur me rastin e nënshkrimit të kontratave  me institucionet publike, ku nga këto kontrata i dyshuari ka përfituar dhjetëra mijëra euro”, thuhet aty.

Insajderi, ka siguruar edhe një nga ‘dëshmitë’ e dorëzuara në polici.

Tutje, në denoncim thuhet se Jakupi ka shfrytëzuar llogarinë bankare të OJQ-së për të pranuar pagesa personale nga personat e tretë.

Aty thuhet se ai si këshilltar i jashtëm i MKRS, e ka përdorur OJQ-në për të nënshkruar kontratë.

“Ekziston dyshim i bazuar se, z. Gani Jakupi, derisa ka qenë i angazhuar si këshillar ijashtëm në Ministrinëe Kulturës, Rinisë dhe Sporteve (MKRS), e ka përdorur OJQ-në për tënënshkruar kontratë me Ministrinë e Kulturës, Rinisë dhe Sportit, si dhe ka pranuar pagesa nga MKRS-ja në shumën prej dhjetëra mijëra euro.

Egzsiton dyshimi i bazuar se, z. Gani Jakupi, në kundërshtim me dispozitat statutare të OJQ-së dhe me dispozitat ligjore, e ka organizuar dhe mbajturkuvendin/mbledhjen e OJQ-së, si dhe ka nxjerrë vendime të kundërligjshme për dhe në emër të OJQ-së“, thuhet në dokumentin të cilin e ka parë Gazeta Insajderi.

Por, i pyetur nga Insajderi, rreth këtyre raportimeve Jakupi, tha se nuk është në dijeni dhe se nuk është kontaktuar nga Krimet Ekonomike.

“Nuk e di. Mue nuk m’kanë kontaktue“, tha shkurt ai për Insajderin.

Gani Jakupi u bë emër i njohur pasi u bë publike kontrata që ai kishte lidhur me Ministrinë e Punëve të Jashtme për të ofruar shërbime si konsulent për Ambasadën Kosovës në Bruksel.