275 kandidatë nga minoritetet testohen për policë

Sot, 275 kandidatë nga minoritetet iu janë nënshtruar testit me shkrim për të kaluar në fazën tjetër të procesit të rekrutimit për të bërë zyrtarë policorë.

Testi është mbajtur në ambientet e Akademisë së Kosovës për Siguri Publike në Vushtrri, duke filluar nga ora 10:00.

Testi përmbante 100 pyetje dhe ishte i dizajnuar për të vlerësuar njohuritë e kandidatëve në fushat e njohurive të përgjithshme, gjuhë dhe letërsi, si dhe matematikë. Për të kaluar testin, kandidatët duhet të sigurojnë të paktën 70% përgjigje të sakta.

Konkursi për këtë test ishte shpallur nga 11 korriku deri më 5 gusht. Procesi i testimit është përcjellë nga zyrtarë të OSBE-së dhe EULEX-it, sipas njoftimit zyrtar.