Komuna e Skënderajt e shpërblen me 1 milion euro tender ish-drejtorin biznesmen

Tenderin në mbi 1 milion euro në Komunën e Skënderajt për rregullimin e Subqendres-Likovc-Ritender e ka fituar ish-drejtori i Urbanizimit dhe Mbrojtjes së Ambientit në këtë komunë, Zymer Delija. Delija ishte emëruar si drejtor në fillim të udhëheqjes së Nurës në Skenderaj. Ndërsa së fundmi kompania që ai udhëheq “ZeD Architects” së bashku me dy kompani tjera kanë fituar tenderin në fjalë.

Gazeta Insjaderi

Komuna e Skënderajt, me 29.02.2024 ka nënshkruar kontratën në vlerë prej mbi 1 milion euro për rregullimin e Subqendres – Likovc – Ritender.

“ZeD Architects, SH.P.K N.N, Ndertimi Haxha Kom SH.P.K.,”, janë kompanitë që u shpërblyen me këtë tender.

Pronari i kompanisë “ZeD Architects”, është ish drejtori i Urbanizimit dhe Mbrojtjes së Ambientit, Zymer Delija.

Ky nuk është i vetmi tender i fituar nga “ZeD Architects”, pasi në shtator kompania që udhëhiqet nga Delija së bashku me një kompani tjetër kishin fituar tenderin prej 500 mijë euro.

“ZeD Architects” me 7 shtator kishte shpallur fitues të tenderit “Renovim i Objekteve Shkollore“, kompanitë “ZeD Architects” dhe “Lioni SHPK”.

Kush është Zymer Delija?

Pronari i kompanisë “ZeD Architects”, Zymer Delija është ish drejtori i Urbanizimit dhe Mbrojtjes së Ambientit, Zymer Delija.

Ai ishte emëruar pas fitores se PDK-së në këtë komunë.

Për Sami Lushtakun, nënkryetarin e Komunës së Skenderajt, Delija ishte “krenari e Skenderajt.

Lushtaku në 2021 kishte shkruar një status ku kishte thurur lavde për Delijan.

“Krenaria Skenderajt i kthehet me profesionistë si Zymeri. Zhvillimi i Skenderajt i ka vitalë të rinjtë si Zymeri, projektet e të cilit do t’i japin tjetër fytyrë qytetit tonë. Me këtë vizion për zhvillimin e Skenderajt, nuk kemi sesi të mos iu hapim rrugë të rinjve të tillë. Zymeri dhe të tjerët si ai e mundësojnë hapjen e një kapitulli të ri, më të ndritshëm se kurrë, për Skenderajn”, kishte shkruar ai.

Para një viti Zymer Delija, kishte dhënë dorëheqje nga posti i drejtorit. Ai kishte kërkuar nga kryetari i Komunës që ta lirojë nga detyra për shkak të angazhimeve të mëdha private qe ai i ka në biznesin e tij familjar./Insajderi.org/