“Ka qenë i vendosur më herët në stoplistë…”, lirohet serbi i arrestuar sot në Jarinjë

Është liruar serbi që u arrestua sot në Jarinjë. Zëvendësdrejtori i Policisë së Kosovës për veriun, Veton Elshani tha se pas intervistimit është përgatitur një raport informues për prokurorinë.

“Është liruar. E kemi bërë një raport informues për Prokurorinë.”, tha Elshani për Insajderin.

Personi në fjalë ishte arrestuar nën dyshimin se ka bërë fotografim të paautorizuar.

“Personi ka qenë nën dyshimin për fotografim të paautorizuar, ka qenë i vendosur në stoplistë dhe është ndaluar në hyrje në Jarinjë duke hyrë nga Serbia në drejtim të Kosovës. Pasi që është ndaluar ai është dërguar në stacionin policor në jug të Mitrovicës për intervistim. Aty është intervistuar dhe para një ore ai është liruar”, ka thënë ai.

Më tej, Elshani tha se ai kishte qenë i vendosur në stoplistë, për atë arsye edhe u arrestua.

“Me siguri ai ka qenë i vendosur më herët në stoplistë, kështu që ka qenë i identifikuar më herët mirëpo në momentin që ne kemi hasur në të e kemi ndaluar dhe e kemi sjellë në stacion policor për intervistim që do të thotë se ky person ka qenë në interes për policinë e Kosovës për me u intervistu në lidhje për fotografim të paautorizuar”, ka thënë ai.

“Ne mund ta konfirmojmë që personi i arrestuar është shtetas kosovar i nacionalitetit serb, ndërsa nëse është pjesëtarë i xhandarmërisë serbë apo jo, ne nuk mundemi me konfirmu edhe me ditë për arsyje se nuk është dhe nuk ka të bëjë me shtetin tonë”, tha ai.