Skandali me Gjicin/ Gjykata e Lartë rrëzon Alma Kaçin

Do të qëndrojë në “arrest shtëpie” gjatë gjykimit

Gjykata e Lartë rrëzoi rekursin e bërë nga Alma Kaçi, duke e lënë atë në masën e sigurisë “arrest shtëpie” gjatë gjykimit në themel të çështjes, ku akuzohet për korrupsion.

40-vjeçarja kishte kundërshtuar vendimet e shkallëve më të ulëta me argumentin se procesi hetimor ndaj saj mund të zhvillohej edhe me një masë më të butë pasi nuk kishte rrezikshmëri dhe se ishte e nevojshme që të punonte.

Kaçi u dërgua e pandehur në gjykatë bashkë me ish-kryebashkiakun e Kukësit, Safet Gjicin, të dy të akuzuar se u përfshinë në korrupsion nëpërmjet favoreve seksuale.

Ata u vunë në masa arresti disa javë pas publikimit të një video, ku të dy ata kryenin marrëdhënie intime në zyrën e kryebashkiakut.

Ky i fundit më pas i delegon vartësit të tij veprimet për të marrë në shqyrtim një projekt të 40-vjeçares për rehabilitimin e qenëve të rrugës në Kukës.

Të dy kanë mohuar akuzat, teksa Alma Kaçi është shprehur se videon e ka filmuar vetë dhe e gjitha ishte nje skemë e saj për të demaskuar Gjicin në veprime të tilla.

Tv Klan