Djegia gjatë urinimit është zakonisht një simptomë e një infeksioni urinar, por jo gjithmonë është kështu

Djegia gjatë urinimit ndonjëherë mund të jetë aq intensive sa ndonjëherë përshkruhet si një ndjenjë sikur një brisk rroje po kalon nëpër traktin tonë urinar

Një ndjesi djegieje gjatë urinimit shfaqet në të gjitha grupmoshat, të dy gjinitë janë të ndjeshme ndaj problemit dhe ky fenomen është mjaft i shpeshtë, sidomos gjatë muajve të ftohtë.

Mund të jetë me intensitet të ndryshëm, nga shqetësimi i lehtë deri te dhimbjet e forta, të cilat mund të lehtësohen vetëm me analgjetikë.

Shkaku më i zakonshëm janë infeksionet urinare, por ka edhe arsye të tjera që mund të jenë paralajmërim për sëmundje më të rënda, transmeton Telegrafi.

Shkaqet më të zakonshme të djegies

Shfaqja e djegies gjatë urinimit është më së shpeshti shenjë e një infeksioni urinar, por mund të ndodhë edhe në sëmundje të tjera të sistemit urogjenital.

Një ndjesi djegieje mund të ndodhë edhe te pacientët që kanë një ngushtim të uretrës. Përveç djegies dhe shqetësimit, ato urinojnë edhe në një rrjedhë të hollë. Gjithashtu, djegia është një simptomë e sëmundjeve seksualisht të transmetueshme dhe ndodh edhe te meshkujt që kanë inflamacion të prostatës. Rëra ose gurët që zbresin nga trakti i sipërm urinar mund të shkaktojnë gjithashtu një ndjesi djegieje gjatë urinimit.

Menopauza dhe tumoret e traktit urinar

Femrat në menopauzë, si dhe ato me çrregullime hormonale për shkak të atrofisë së indeve rreth uretrës, shpesh ndjejnë një ndjesi djegieje në uretër.

Arsyeja më e rëndë që mund të çojë në djegie gjatë urinimit, janë tumoret e rrugëve urinare, që është një alarm shtesë kur shfaqet kjo simptomë. Kjo ndjenjë me të gjitha shkaqet, mund të jetë aq intensive saqë përshkruhet si ndjesia e briskut që kalon nëpër traktin urinar.

Si të trajtoni inflamacionin e prostatës

– Inflamacioni i prostatës shfaqet tek meshkujt, pavarësisht moshës dhe simptomat janë urinim i shpeshtë, urgjent dhe i vështirësuar, së bashku me temperaturë të lartë. Te meshkujt më të rinj, shkaku më së shpeshti është një infeksion i shkaktuar nga marrëdhëniet seksuale të pambrojtura, dhe një ftohje e rëndë shpesh është shkaktar si tek pacientët e moshuar ashtu edhe tek ata më të rinj. Diagnoza vendoset pas një historie të detajuar, ekzaminimit rektal, gjetjeve laboratorike të gjakut e urinës dhe trajtimi zakonisht zgjat nga 4 deri në 6 javë, me terapi të zgjatur me antibiotikë.

Lexo po ashtu
Infeksioni urinar, si ta trajtojmë?

Ndjesia e pickimit për shkak të infeksionit urinar ndalet relativisht shpejt me terapi

Duke pasur parasysh se infeksioni urinar është shkaku më i zakonshëm i djegies gjatë urinimit, urologët këshillojnë kryesisht rritjen e marrjes së lëngjeve, për të lehtësuar shqetësimin. Është e nevojshme, të jepet urina për ekzaminim për të përcaktuar më saktë se për çfarë bëhet fjalë. Nëse simptomat nuk largohen brenda dy deri në tre ditë, është e nevojshme të konsultoheni me mjekun.

– Terapia e infeksioneve urinare mund të jetë afatshkurtër ose afatgjatë. Zakonisht, infeksionet urinare të pakomplikuara trajtohen me antibiotikë për 3 deri në 7 ditë, por ka edhe situata kur mjafton vetëm një dozë antibiotikësh. Infeksionet e veshkave, për shembull, trajtohen për 10 deri në 15 ditë.

Nëse i shpërfillim simptomat, komplikimet mund të jenë fatale

– Infeksioni urinar fillimisht prek vetëm regjionin e fshikëzës dhe më pas mund të kurohet shpejt dhe lehtë. Por, nëse neglizhohet, infeksioni përhapet në veshka, ku shkakton inflamacion serioz të shoqëruar me temperaturë dhe gjendje të keqe të përgjithshme. Kjo është një gjendje që mund të kthehet në sepsë dhe më pas jeta e pacientit kërcënohet seriozisht. Sëmundjet veneriane të patrajtuara mund të çojnë në ngushtim të uretrës dhe sterilitet, ndërsa tumoret e panjohura të traktit urinar, të cilat ndonjëherë japin një ndjesi djegieje gjatë urinimit si simptoma e vetme, mund të vazhdojnë të përhapen dhe të çojnë në një përfundim fatal.

Lexo po ashtu
Këto tri bimë janë shpëtim nga infeksionet e traktit urinar: Kështu përgatiten siç duhet çajet prej tyre!

Si të mbroni traktin urinar dhe të parandaloni infeksionet

Parandalimi i infeksioneve urinare dhe shëndeti më i mirë i traktit urinar bëhet fillimisht me marrjen e mjaftueshme të lëngjeve. /Telegrafi/

The post Djegia gjatë urinimit është zakonisht një simptomë e një infeksioni urinar, por jo gjithmonë është kështu appeared first on Telegrafi.