Zelensky dhe Scholz kërkojnë zgjatjen e marrëveshjes së drithërave

Presidenti i Ukrainës, Volodymyr Zelensky, dhe kancelari i Gjermanisë, Olaf Scholz, bënë thirrje më 3 korrik për zgjatjen e një marrëveshjeje që lejon eksportin e sigurt të grurit dhe plehrave nga tre porte ukrainase të Detit të Zi, tha një zyrtar.

Liderët e Ukrainës dhe Gjermanisë e bënë këtë thirrje për zgjatje përtej 17 korrikut gjatë një bisede telefonike, tha zëdhënësi i Scholz.

Zëdhënësi tha se gjatë telefonatës u bisedua edhe për ndihmat humanitare, ushtarake dhe politike për Ukrainën.

Më 21 qershor, Kremlini kishte thënë se nuk ka “asnjë bazë” për zgjatjen e marrëveshjes së Detit të Zi për drithëra, duke thënë se marrëveshja e ndërmjetësuar nga Turqia dhe Kombet e Bashkuara (OKB) nuk po zbatohej siç duhet.