“1 mld dollarë në 1 vit”, Putin zbulon se nga financohet Wagner

Presidenti rus, Vladimir Putin ka thënë se anëtarët e grupit mercenar Wagner financoheshin plotësisht nga shteti.

Sipas Putin, Wagner-it iu dhanë 86.262 miliardë rubla (1 miliard dollarë) vetëm nga maji 2022 deri në maj 2023 për paga dhe shpërblime, të cilat erdhën nga ministria e mbrojtjes dhe buxheti i shtetit. Revolta e ushtrisë private të shtunën tronditi Rusinë.

Udhëheqësi i saj, Yevgeny Prigozhin, mbërriti në Bjellorusi të martën pasi ra dakord të largohej nga Rusia.

Ardhja e tij u konfirmua nga udhëheqësi bjellorus Alexander Lukashenko. Më parë, një avion privat i lidhur me Prigozhin u gjurmua duke u ulur në Minsk, kryeqyteti i Bjellorusisë.

Të shtunën, trupat mercenare të udhëhequra nga shefi i Wagner-it, Yevgeny Prigozhin, pushtuan qytetin jugor rus të Rostov-on-Don, marshuan drejt Moskës dhe rrëzuan helikopterët ushtarakë rusë dhe një aeroplan në rrugën e tyre.

Rebelimi i tyre më vonë u ndërpre pasi u arrit një marrëveshje me ndihmën e Lukashenkos.

Autoritetet ruse thanë se Wagner do të çarmatoset, por anëtarët e tij do t’i shpëtojnë ndjekjes penale për rebelimin e tij jetëshkurtër.

“Ne gjithmonë i trajtuam me shumë respekt luftëtarët dhe komandantët e këtij grupi, sepse ata vërtet treguan trimëri dhe heroizëm”, tha Putin.

Ai tha se autoritetet do të shqyrtojnë se si janë shpenzuar paratë e paguara për Wagner dhe udhëheqësin e tij.