Publikohen fotografitë e arrestimit të 21-vjeçarit të masakrës në Serbi

Janë publikuar në mediat serbe fotografitë e vrasësit 21-vjeçar, Uros B. i cili qëlloi me armë për vdekje 8 persona dhe plagosi 14 të tjerë në tre fshatra pranë Mlladenovicit.

Banorët e një nga fshatrave ku ndodhi ngjarja, shprehen se në fshatin Dubonë ka patur kaos të plotë. Ata tregojnë se shtatë persona ishin ulur pranë shkollës kur 21-vjeçari doli nga makina dhe ka hapur zjarr. Personat e vrarë dhe të plagosur prej tij, kanë qenë të gjithë fëmijë, të cilët nuk kishin shkaktuar ndonjë problem të mëparshëm.

Një nga banorët e fshatit tregon që plumbat fluturonin gjithandej dhe ata nuk kishin mundësi të shpëtonin veten e tyre, përveç dikujt i cili është shtrirë poshtë një stoli. Ngjarja e rëndë, kishte bërë që të gjithë banorët të dilnin me vrap nga shtëpitë e tyre. Ata kanë telefonuar policinë dhe ambulancën, sakaq janë përpjekur të shpëtonin fëmijët e plagosur.

Një nga të vrarët, ka qenë dhe një polic i ri i cili tentoi ta ndalonte, por 21-vjeçari e la të vdekur, nga plumbat e kallashnikovit. Sipas informacioneve të mediave vendase, thuhet se 21-vjeçari kishte rrëmbyer një taksist, duke e kërcënuar me një granatë dore, për të shkuar në vendstrehimin e tij.