OKB: Kemi dokumentuar qindra zhdukje dhe ndalime arbitrare nga forcat ruse dhe ukrainase

Kombet e Bashkuara kanë dokumentuar qindra raste të zhdukjeve me forcë dhe ndalimeve arbitrare nga forcat ukrainase dhe ruse që nga fillimi i pushtimit, sipas Shefit të Misionit Monitorues të OKB-së në Ukrainë.

OKB-ja ka dokumentuar më shumë se 600 raste të zhdukjeve me forcë dhe ndalimeve arbitrare të kryera nga forcat ruse, dhe 91 nga forcat ukrainase, që nga fillimi i luftës më 24 shkurt të vitit të kaluar deri në fund të janarit 2023, raporton CNN.

“Fatkeqësisht, ne zbuluam se ka pasur shkelje të konsiderueshme nga të dyja palët,” tha Matilda Bogner, duke iu referuar të burgosurve të luftës që iu nënshtruan torturave, keqtrajtimit dhe kushteve të tmerrshme gjatë ndalimit.

Komisioneri i Lartë i Kombeve të Bashkuara për të Drejtat e Njeriut publikoi të premten raportin e tij të fundit, i cili katalogonte rastet e viktimave civile, torturave, përdhunimeve, zhdukjeve me forcë dhe ndalimeve arbitrare.