Greqi/ Pamjet e tragjedisë, kërkohet në vagonin e tretë, nisin hetimet për përplasjen e dy trenave

Mëngjesi nxorri në pah tragjedinë e rëndë të ndodhur në Greqi, pas përplasjes së dy trenave.

Treni me pasagjerë që ishte nisur nga Athina drejt Selanikut është përplasur me një tren mallrash që po lëvizte në drejtim të kundërt. Të dy trenat kanë qenë duke ecur në të njëjtat shina dhe përplasja është shënuar në zonën e Evangelismos gjatë orëve të natës.

Deri tani flitet për 38 të vdekur dhe 85 të plagosur nga të cilët 66 janë në spital.

Skuadrat e shpëtimit ndodhen në vagonin e tretë ku ka dyshime se ka dhe atje pasagjerë të bllokuar.

Mediat greke shkruajnë se mbi 20 persona mendohet se janë në vagon dhe se po ndërhyjnë skuadrat e shpëtimit.

Treni që ishte nisur nga Athina drejt Selanikut mendohet se ka pasur 430 persona, por 80 prej tyre kanë zbritur në Larisa, ndërsa pjesa tjetër ka vazhduar rrugën deri në përplasjen e rëndë të dy trenave pranë qytetit Tempe.

Tashmë ka nisur një hetim për të zbuluar shkaqet e këtij aksidenti tragjik.

Prokurori i Gjykatës së Lartë, Isidoros Dogiakos i caktoi mbikëqyrjen e hetimeve prokurorit të Larisës, Stamatis Daskalopoulos.