Ministri i Mbrojtjes së Kosovës, Armend Mehaj, ka reaguar pas lajmit se FSK-ja gjatë operimit të tyre në Turqi ka shpëtuar një fëmijë të moshës dyvjeçare dhe është duke bërë përpjekje të shpëtojë edhe nënën e saj, e cila ka mbetur nën rrënoja.
Mehaj, përmes një postimi në Facebook, është shprehur i lumtur dhe krenar për djemtë dhe vashat tona që janë pjesë e ekipit të shpëtimit në Turqi.
Postimi i plotë:
Ekipi i FSK-së ka arritur të nxjerr nga rrënojat një fëmijë të moshës 2 vjeçare
Ekipet e Kërkim-Shpëtimit të Forcës së Sigurisë së Kosovës që nga mëngjesi janë duke operuar me kapacitete të plota në Hatay të Turqisë.
Në orët e mbrëmjes kanë arritur të nxjerrin një fëmijë të moshës dy vjeçare, dhe janë duke bërë përpjekjet maksimale për të shpëtuar edhe nënën e saj që është e ngujuar në rrënoja.
Ekipet tona gjatë operacionit kanë hasur në viktima në objektet e kollapsuara, por prioritet është duke ju dhënë atyre vendeve ku janë detektuar persona të gjallë.
Krenar me djemtë dhe vashat tona!
